៨. កាលិកនិទ្ទេសោ

កាលិកា ចាតិ –

៨៤. បដិគ្គហិតា ចត្តារោ, កាលិកា យាវកាលិកំ;

យាមកាលិកំ សត្តាហ-កាលិកំ យាវជីវិកំ.

៨៥. បិដ្ឋំ មូលំ ផលំ ខជ្ជំ, គោរសោ ធញ្ញភោជនំ;

យាគុសូបប្បភុតយោ, ហោន្តេតេ យាវកាលិកា.

៨៦. មធុមុទ្ទិកសាលូក-ចោចមោចម្ពជម្ពុជំ;

ផារុសំ នគ្គិសន្តត្តំ, បានកំ យាមកាលិកំ.

៨៧. សានុលោមានិ ធញ្ញានិ, ឋបេត្វា ផលជោ រសោ;

មធូកបុប្ផមញ្ញត្រ, សព្ពោ បុប្ផរសោបិ ច.

៨៨. សព្ពបត្តរសោ ចេវ, ឋបេត្វា បក្កឌាកជំ;

សីតោទមទ្ទិតោទិច្ច-បាកោ វា យាមកាលិកោ.

៨៩. សប្បិនោនីតតេលានិ, មធុផាណិតមេវ ច;

សត្តាហកាលិកា សប្បិ, យេសំ មំសមវារិតំ.

៩០. តេលំ តិលវសេរណ្ឌ-មធុសាសបសម្ភវំ;

ខុទ្ទាភមរមធុករិ-មក្ខិកាហិ កតំ មធុ;

រសាទិឧច្ឆុវិកតិ, បក្កាបក្កា ច ផាណិតំ.

៩១. សវត្ថុបក្កា សាមំ វា, វសា កាលេ អមានុសា;

អញ្ញេសំ ន បចេ វត្ថុំ, យាវកាលិកវត្ថុនំ.

៩២. ហលិទ្ទិំ សិង្គិវេរញ្ច, វចត្តំ លសុណំ វចា;

ឧសីរំ ភទ្ទមុត្តញ្ចាតិវិសា កដុរោហិណី;

បញ្ចមូលាទិកញ្ចាបិ, មូលំ តំ យាវជីវិកំ.

៩៣. ពិឡង្គំ មរិចំ គោដ្ឋ-ផលំ បិប្ផលិ រាជិកា;

តិផលេរណ្ឌកាទីនំ, ផលំ តំ យាវជីវិកំ.

៩៤. កប្បាសនិម្ពកុដជបដោលសុលសាទិនំ;

សូបេយ្យបណ្ណំ វជ្ជេត្វា, បណ្ណំ តំ យាវជីវិកំ.

៩៥. ឋបេត្វា ឧច្ឆុនិយ្យាសំ,

សរសំ ឧច្ឆុជំ តចំ;

និយ្យាសោ ច តចោ សព្ពោ,

លោណំ លោហំ សិលា តថា.

៩៦. សុទ្ធសិត្ថញ្ច សេវាលោ, យញ្ច កិញ្ចិ សុឈាបិតំ;

វិកដាទិប្បភេទញ្ច, ញាតព្ពំ យាវជីវិកំ.

៩៧. មូលំ សារំ តចោ ផេគ្គុ, បណ្ណំ បុប្ផំ ផលំ លតា;

អាហារត្ថ មសាធេន្តំ, សព្ពំ តំ យាវជីវិកំ.

៩៨. សព្ពកាលិកសម្ភោគោ, កាលេ សព្ពស្ស កប្បតិ;

សតិ បច្ចយេ វិកាលេ, កប្បតេ កាលិកត្តយំ.

៩៩. កាលយាមមតិក្កន្តា, បាចិត្តិំ ជនយន្តុភោ;

ជនយន្តិ ឧភោបេតេ, អន្តោវុត្ថញ្ច សន្និធិំ.

១០០. សត្តាហកាលិកេ សត្ត, អហានិ អតិនាមិតេ;

បាចិត្តិ បាឡិនារុឡ្ហេ, សប្បិអាទិម្ហិ ទុក្កដំ.

១០១. និស្សដ្ឋលទ្ធំ មក្ខេយ្យ, នង្គំ នជ្ឈោហរេយ្យ ច;

វិកប្បេន្តស្ស សត្តាហេ, សាមណេរស្សធិដ្ឋតោ;

មក្ខនាទិញ្ច នាបត្តិ, អញ្ញស្ស ទទតោបិ ច.

១០២. យាវកាលិកអាទីនិ, សំសដ្ឋានិ សហត្តនា;

គាហាបយន្តិ សព្ភាវំ, តស្មា ឯវមុទីរិតំ.

១០៣. បុរេ បដិគ្គហិតញ្ច, សត្តាហំ យាវជីវិកំ;

សេសកាលិកសម្មិស្សំ, បាចិត្តិ បរិភុញ្ជតោ.

១០៤. យាវកាលិកសម្មិស្សំ, ឥតរំ កាលិកត្តយំ;

បដិគ្គហិតំ តទហុ, តទហេវ ច ភុញ្ជយេ.

១០៥. យាមកាលិកសម្មិស្សំ, សេសមេវំ វិជានិយំ;

សត្តាហកាលិកមិស្សញ្ច, សត្តាហំ កប្បតេតរន្តិ.