៩. បដិគ្គាហនិទ្ទេសោ

បដិគ្គាហោតិ –

១០៦. ទាតុកាមាភិហារោ ច, ហត្ថបាសេរណក្ខមំ;

តិធា ទេន្តេ ទ្វិធា គាហោ, បញ្ចង្គេវំ បដិគ្គហោ.

១០៧. អសំហារិយេ តត្ថជាតេ, សុខុមេ ចិញ្ចអាទិនំ;

បណ្ណេ វាសយ្ហភារេ ច, បដិគ្គាហោ ន រូហតិ.

១០៨. សិក្ខាមរណលិង្គេហិ, អនបេក្ខវិសគ្គតោ;

អច្ឆេទានុបសម្បន្ន-ទានា គាហោបសម្មតិ.

១០៩. អប្បដិគ្គហិតំ សព្ពំ, បាចិត្តិ បរិភុញ្ជតោ;

សុទ្ធញ្ច នាតិពហលំ, កប្បតេ ឧទកំ តថា.

១១០. អង្គលគ្គមវិច្ឆិន្នំ, ទន្តក្ខិកណ្ណគូថកំ;

លោណស្សុខេឡសិង្ឃាណិ-សេម្ហមុត្តករីសកំ.

១១១. គូថមត្តិកមុត្តានិ, ឆារិកញ្ច តថាវិធេ;

សាមំ គហេត្វា សេវេយ្យ, អសន្តេ កប្បការកេ.

១១២. ទុរូបចិណ្ណេ រជោកិណ្ណេ, អថុគ្គហប្បដិគ្គហេ;

អន្តោវុត្ថេ សយំបក្កេ, អន្តោបក្កេ ច ទុក្កដន្តិ.