៧. បវារណានិទ្ទេសោ

បវារណាតិ –

៧៣. យេនីរិយាបថេនាយំ, ភុញ្ជមានោ បវារិតោ;

តតោ អញ្ញេន ភុញ្ជេយ្យ, បាចិត្តិនតិរិត្តកំ.

៧៤. អសនំ ភោជនញ្ចេវ, អភិហារោ សមីបតា;

កាយវាចាបដិក្ខេបោ, បញ្ចអង្គា បវារណា.

៧៥. ឱទនោ សត្តុ កុម្មាសោ, មច្ឆោ មំសញ្ច ភោជនំ;

សាលិ វីហិ យវោ កង្គុ, កុទ្រូសវរគោធុមា;

សត្តន្នមេសំ ធញ្ញានំ, ឱទនោ ភោជ្ជយាគុ ច.

៧៦. សាមាកាទិតិណំ កុទ្រូសកេ វរកចោរកោ;

វរកេ សាលិយញ្ចេវ, នីវារោ សង្គហំ គតោ.

៧៧. ភដ្ឋធញ្ញមយោ សត្តុ, កុម្មាសោ យវសម្ភវោ;

មំសោ ច កប្បិយោ វុត្តោ, មច្ឆោ ឧទកសម្ភវោ.

៧៨. ភុញ្ជន្តោ ភោជនំ កប្ប-មកប្បំ វា និសេធយំ;

បវារេយ្យាភិហដំ កប្បំ, តន្នាមេន ឥមន្តិ វា.

៧៩. លាជា តំសត្តុភត្តានិ, គោរសោ សុទ្ធខជ្ជកោ;

តណ្ឌុលា ភដ្ឋបិដ្ឋញ្ច, បុថុកា វេឡុអាទិនំ.

៨០. ភត្តំ វុត្តាវសេសានំ, រសយាគុ រសោបិ ច;

សុទ្ធយាគុផលាទីនិ, ន ជនេន្តិ បវារណំ.

៨១. បវារិតេន វុដ្ឋាយ, អភុត្តេន ច ភោជនំ;

អតិរិត្តំ ន កាតព្ពំ, យេន យំ វា បុរេ កតំ.

៨២. កប្បិយំ គហិតញ្ចេវុ-ច្ចារិតំ ហត្ថបាសគំ;

អតិរិត្តំ ករោន្តេវំ, ‘‘អលមេត’’ន្តិ ភាសតុ.

៨៣. ន ករេនុបសម្បន្ន-ហត្ថគំ បេសយិត្វាបិ;

ការេតុំ លព្ភតេ សព្ពោ, ភុញ្ជិតុំ តមការកោតិ.