៤៤. ឧបោសថនិទ្ទេសោ

ឧបោសថោតិ –

៤១០. ទុវេ ឧបោសថា ចាតុ-ទ្ទសោ បន្នរសោ ឥតិ;

សុត្តុទ្ទេសមធិដ្ឋាន-បារិសុទ្ធិវសា តយោ.

៤១១. សុត្តុទ្ទេសោវ សង្ឃស្ស, អធិដ្ឋានឧបោសថោ;

បុគ្គលស្សេវ សេសានំ, បារិសុទ្ធិឧបោសថោ.

៤១២. បុព្ពកិច្ចេ ច ករណេ, បត្តកល្លេ សមានិតេ;

សុត្តំ ឧទ្ទិសតិ សង្ឃោ, បញ្ចធា សោ វិភាវិតោ.

៤១៣. វិនាន្តរាយំ សង្ខេបេ-នុទ្ទេសោ វិនិវារិតោ;

‘‘ថេរោវ ឥស្សរោ ទ្វីសុ, ឧទ្ទេសេស្វេត្ថ តីសុ វា;

វិសទេសូ’’តិ វុត្តត្តា, អវត្តន្តេបិ វដ្ដតិ.

៤១៤. អាគច្ឆេយ្យុំ យទិ សមា, ឧទ្ទិសន្តេ វ ថោកិកា;

ឧទ្ទិដ្ឋំ យំ សុឧទ្ទិដ្ឋំ, សោតព្ពមវសេសកំ.

៤១៥. ឧទ្ទិដ្ឋមត្តេ សកលា-យេកច្ចាយុដ្ឋិតាយ វា;

បារិសុទ្ធិំ ករេយ្យេសំ, សន្តិកេ ពហុកាថ ចេ;

កត្វា សព្ពវិកប្បេសុ, បុព្ពកិច្ចំ បុនុទ្ទិសេ.

៤១៦. បន្នរសោវាសិកានំ, ឥតរានំ សចេតរោ;

សមានេតរេនុវត្តន្តុ, បុរិមានំ សចេធិកា;

បុរិមា អនុវត្តន្តុ, តេសំ សេសេប្យយំ នយោ.

៤១៧. បាដិបទោវាសិកានំ, ឥតរានំ ឧបោសថោ;

សមថោកានំ សាមគ្គិំ, មូលដ្ឋា ទេន្តុ កាមតោ.

៤១៨. ពហិ គន្ត្វាន កាតព្ពោ, នោ ចេ ទេន្តិ ឧបោសថោ;

ទេយ្យានិច្ឆាយ សាមគ្គី, ពហូសុ ពហិ វា វជេ.

៤១៩. បាដិបទេគន្តុកានំ, ឯវមេវ អយំ នយោ;

សាវេយ្យ សុត្តំ សញ្ចិច្ច, អស្សាវេន្តស្ស ទុក្កដំ.

៤២០. សម្មជ្ជិតុំ បទីបេតុំ, បញ្ញាបេតុំ ទកាសនំ;

ន ករេយ្យ តថា កល្លោ, មហាថេរេន បេសិតោ.

៤២១. សម្មជ្ជិត្វា បទីបេត្វា, បដ្ឋបេត្វា ទកាសនំ. គណញត្តិំ ឋបេត្វេវំ, កត្តព្ពោ តីហុបោសថោ. ‘‘សុណន្តុ មេ អាយស្មន្តា, អជ្ជុបោសថោ បន្នរសោ, យទាយស្មន្តានំ បត្តកល្លំ, មយំ អញ្ញមញ្ញំ បារិសុទ្ធិឧបោសថំ ករេយ្យាមា’’តិ.

៤២២. ឯកំសំ ចីវរំ កត្វា, និសីទិត្វា ឧក្កុដិកំ,. ថេរេន អញ្ជលិំ តេវំ, បគ្គយ្ហ សមុទីរិយា. ‘‘បរិសុទ្ធោ អហំ អាវុសោ, បរិសុទ្ធោតិ មំ ធារេថា’’តិ, វទេ យាវតតីយកំ.

៤២៣. សមត្តបុព្ពារម្ភេន, តេ នវេនេវមីរិយា. ‘‘បរិសុទ្ធោ អហំ ភន្តេ, បរិសុទ្ធោតិ មំ ធារេថា’’តិ, វទេ យាវតតីយកំ.

៤២៤. ទ្វីសុ ថេរេន កត្តព្ពំ, កត្វេវមីរិយោ នវោ. ‘‘បរិសុទ្ធោ អហំ អាវុសោ, បរិសុទ្ធោតិ មំ ធារេហី’’តិ តិក្ខត្តុំ វត្តព្ពោ.

៤២៥. នវេន ថេរោ តិក្ខត្តុំ, ឯវមស្ស ឧទីរិយោ;

‘‘បរិសុទ្ធោ អហំ ភន្តេ, បរិសុទ្ធោតិ មំ ធារេថា’’តិ.

៤២៦. បុព្ពកិច្ចំ សមាបេត្វា, អធិដ្ឋេយ្យេវមេកកោ. ‘‘អជ្ជ មេ ឧបោសថោ បន្នរសោតិ វា ចាតុទ្ទសោតិ វា អធិដ្ឋាមី’’តិ វត្តព្ពំ, នោ ចេធិដ្ឋេយ្យ ទុក្កដំ.

៤២៧. យត្ថ វសន្តិ ចត្តារោ, តយោ វា យទិ វា ទុវេ;

បារិសុទ្ធិំ ហរិត្វាន, ឯកេកស្សិតរីតរេ;

តំ តំ ឧបោសថំ កយិរុំ, សិយា អាបត្តិ ទុក្កដំ.

៤២៨. វគ្គេ សមគ្គេ វគ្គោតិ, សញ្ញិនោ វិមតិស្ស វា;

ទុក្កដំ ករោតោ ភេទា-ធិប្បាយេន ថុល្លច្ចយំ;

វគ្គេ សមគ្គេនាបត្តិ, សមគ្គោ ឥតិ សញ្ញិនោ.

៤២៩. ឧក្ខិត្តស្ស គហដ្ឋស្ស, សេសានំ សហធម្មិនំ;

បារាជិកស្សាភព្ពស្ស, សិក្ខានិក្ខិត្តកស្ស ច.

៤៣០. និសិន្នបរិសាយញ្ច, សភាគាបត្តិកោ តថា;

ឆន្ទេន បរិវុត្ថេន, បាតិមោក្ខំ ន ឧទ្ទិសេ.

៤៣១. អទេសយិត្វានាបន្នំ, នាវិកត្វាន វេមតិំ;

នុបោសថេបិ វា កាតុំ, បោសថោ ន ច កប្បតិ.

៤៣២. អដ្ឋិតោបោសថាវាសា, ន វជេ តទហូ វិនា;

អន្តរាយំ វ សង្ឃំ វា-ធិដ្ឋាតុំ សីមមេវ វាតិ.