៤៥. បវារណានិទ្ទេសោ

បវារណាតិ –

៤៣៣. ទ្វិន្នំ តិណ្ណំ ចតុន្នញ្ច, អញ្ញមញ្ញប្បវារណា;

ឯកស្ស ច អធិដ្ឋានំ, សេសា សង្ឃប្បវារណា.

៤៣៤. បុព្ពកិច្ចេ ច ករណេ, បត្តកល្លេ សមានិតេ;

ឋបេត្វា ញត្តិំ សង្ឃេន, កត្តព្ពេវំ បវារណា.

‘‘សុណាតុ មេ ភន្តេ សង្ឃោ, អជ្ជ បវារណា បន្នរសី, យទិ សង្ឃស្ស បត្តកល្លំ, សង្ឃោ បវារេយ្យា’’តិ.

៤៣៥. ឯកំសំ ចីវរំ កត្វា, និសីទិត្វា ឧក្កុដិកំ;

ថេរេន អញ្ជលិំ សង្ឃោ, បគ្គយ្ហ សមុទីរិយោ.

៤៣៦. ‘‘សង្ឃំ, អាវុសោ, បវារេមិ ទិដ្ឋេន វា សុតេន វា បរិសង្កាយ វា, វទន្តុ មំ អាយស្មន្តោ អនុកម្បំ ឧបាទាយ, បស្សន្តោ បដិករិស្សាមិ. ទុតិយម្បិ…បេ… តតិយម្បិ, អាវុសោ, សង្ឃំ បវារេមិ ទិដ្ឋេន វា សុតេន វា បរិសង្កាយ វា, វទន្តុ មំ អាយស្មន្តោ អនុកម្បំ ឧបាទាយ, បស្សន្តោ បដិករិស្សាមី’’តិ.

៤៣៧. បវារេន្តេសុ ថេរេសុ, និសជ្ជុក្កុដិកំ នវោ;

បវារេតិ សយំ យាវ, ឧក្កុដិកោវ អច្ឆតុ.

៤៣៨. បុព្ពារម្ភំ សមាបេត្វា, នវោ សង្ឃមុទីរយេ.

៤៣៩. ‘‘សង្ឃំ, ភន្តេ, បវារេមិ ទិដ្ឋេន វា សុតេន វា បរិសង្កាយ វា, វទន្តុ មំ អាយស្មន្តោ អនុកម្បំ ឧបាទាយ, បស្សន្តោ បដិករិស្សាមិ. ទុតិយម្បិ…បេ… តតិយម្បិ, ភន្តេ, សង្ឃំ បវារេមិ ទិដ្ឋេន វា សុតេន វា បរិសង្កាយ វា, វទន្តុ មំ អាយស្មន្តោ អនុកម្បំ ឧបាទាយ, បស្សន្តោ បដិករិស្សាមី’’តិ.

៤៤០. ទានេន ធម្មសាកច្ឆា, កលហេហិ ច រត្តិយា;

តេវាចិកាយ ឱកាសេ-សតិ ខេបិតភាវតោ;

អន្តរាយេ ទសវិធេ, ញត្តិំ វត្វានុរូបតោ.

៤៤១. ‘‘សុណាតុ មេ ភន្តេ សង្ឃោ, មនុស្សេហិ ទានំ ទេន្តេហិ, ទ្វីហិ ភិក្ខូហិ ធម្មំ សាកច្ឆន្តេហិ, កលហំ ករោន្តេហិ យេភុយ្យេន រត្តិ ខេបិតា. សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ រត្តិ វិភាយិស្សតិ. អយំ រាជន្តរាយោ, អយំ ចោរន្តរាយោ, អយំ អគ្យន្តរាយោ, អយំ ឧទកន្តរាយោ, អយំ មនុស្សន្តរាយោ, អយំ អមនុស្សន្តរាយោ, អយំ វាឡន្តរាយោ, អយំ សរីសបន្តរាយោ, អយំ ជីវិតន្តរាយោ, អយំ ព្រហ្មចរិយន្តរាយោ. សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ ព្រហ្មចរិយន្តរាយោ ភវិស្សតិ. យទិ សង្ឃស្ស បត្តកល្លំ, សង្ឃោ ទ្វេវាចិកំ, ឯកវាចិកំ, សមានវស្សិកំ បវារេយ្យា’’តិ.

៤៤២. បវារេយ្យានុរូបេន, យថាឋបិតញត្តិយា;

អាគច្ឆេយ្យុំ យទិ សមា, អាទិកា ចេត្ថ អាហរេ.

៤៤៣. ឯវំ តិចតុវគ្គោ ច, ញត្តិំ វត្វា បវារយេ. ‘‘សុណន្តុ មេ អាយស្មន្តា, អជ្ជ បវារណា បន្នរសី, យទាយស្មន្តានំ បត្តកល្លំ, មយំ អញ្ញមញ្ញំ បវារេយ្យាមា’’តិ.

៤៤៤. ឯកំសំ ចីវរំ កត្វា, និសីទិត្វា ឧក្កុដិកំ;

ថេរេន អញ្ជលិំ តេវំ, បគ្គយ្ហ សមុទីរិយា.

៤៤៥. ‘‘អហំ, អាវុសោ, អាយស្មន្តេ បវារេមិ ទិដ្ឋេន វា សុតេន វា បរិសង្កាយ វា, វទន្តុ មំ អាយស្មន្តា អនុកម្បំ ឧបាទាយ, បស្សន្តោ បដិករិស្សាមិ. ទុតិយម្បិ…បេ… តតិយម្បិ អហំ, អាវុសោ, អាយស្មន្តេ បវារេមិ ទិដ្ឋេន វា សុតេន វា បរិសង្កាយ វា, វទន្តុ មំ អាយស្មន្តា អនុកម្បំ ឧបាទាយ, បស្សន្តោ បដិករិស្សាមី’’តិ.

នវេនាបិ ‘‘អហំ, ភន្តេ, អាយស្មន្តេ បវារេមិ ទិដ្ឋេន វា សុតេន វា បរិសង្កាយ វា, វទន្តុ មំ អាយស្មន្តា អនុកម្បំ ឧបាទាយ, បស្សន្តោ បដិករិស្សាមិ. ទុតិយម្បិ…បេ… តតិយម្បិ អហំ, ភន្តេ, អាយស្មន្តេ បវារេមិ ទិដ្ឋេន វា សុតេន វា បរិសង្កាយ វា, វទន្តុ មំ អាយស្មន្តា អនុកម្បំ ឧបាទាយ, បស្សន្តោ បដិករិស្សាមី’’តិ.

៤៤៦. ទ្វីសុ ថេរេន កត្តព្ពំ, នវោ កត្វេវមីរិយោ.

៤៤៧. ‘‘អហំ, អាវុសោ, អាយស្មន្តំ បវារេមិ ទិដ្ឋេន វា សុតេន វា បរិសង្កាយ វា, វទតុ មំ អាយស្មា អនុកម្បំ ឧបាទាយ, បស្សន្តោ បដិករិស្សាមិ. ទុតិយម្បិ…បេ… តតិយម្បិ អហំ, អាវុសោ, អាយស្មន្តំ បវារេមិ ទិដ្ឋេន វា សុតេន វា បរិសង្កាយ វា, វទតុ មំ អាយស្មា អនុកម្បំ ឧបាទាយ, បស្សន្តោ បដិករិស្សាមី’’តិ.

នវេនាបិ ‘‘អហំ, ភន្តេ, អាយស្មន្តំ បវារេមិ ទិដ្ឋេន វា សុតេន វា បរិសង្កាយ វា, វទតុ មំ អាយស្មា អនុកម្បំ ឧបាទាយ, បស្សន្តោ បដិករិស្សាមិ. ទុតិយម្បិ…បេ… តតិយម្បិ អហំ, ភន្តេ, អាយស្មន្តំ បវារេមិ ទិដ្ឋេន វា សុតេន វា បរិសង្កាយ វា, វទតុ មំ អាយស្មា អនុកម្បំ ឧបាទាយ, បស្សន្តោ បដិករិស្សាមី’’តិ.

៤៤៨. បុព្ពកិច្ចំ សមាបេត្វា, អធិដ្ឋេយ្យេវមេកកោ. ‘‘អជ្ជ មេ បវារណា ចាតុទ្ទសីតិ វា បន្នរសីតិ វា អធិដ្ឋាមី’’តិ វត្តព្ពំ.

៤៤៩. យស្មិំ វសន្តិ វា បញ្ច, ចត្តារោ វា តយោ ទុវេ;

បវារណំ ហរិត្វាន, ឯកេកស្សិតរីតរេ.

៤៥០. តំ តំ បវារណំ កយិរុំ,

សិយា អាបត្តិ ទុក្កដំ;

សេសា ឧបោសថេ វុត្តា,

គាថាយោ ចេត្ថ អាហរេ.

៤៥១. បវារិតេវ សង្ឃម្ហិ, បារិសុទ្ធិឧបោសថំ;

ករេយ្យ ឆិន្នវស្សោ វា, អវុត្ថោ វានុបគតោ.

៤៥២. ចាតុមាសិនិយា ចាបិ, កតេ សង្ឃេនុបោសថេ;

វុត្ថវស្សា បវារេយ្យុំ, សចេ អប្បតរា សិយុន្តិ.