៤៣. ឆន្ទទាននិទ្ទេសោ

ឆន្ទទានាទីតិ –

៣៩៩. ភេរិំ ឃណ្ដិំ បតាឡេត្វា, កម្មប្បត្តេ សមាគតេ;

សង្ឃេ ហរេយ្យ ឆន្ទំ វា, បារិសុទ្ធិំ បវារណំ.

៤០០. ឯកំ ភិក្ខុំ ឧបគ្គម្ម, និសីទិត្វា ឧក្កុដិកំ;

អញ្ជលិំ បគ្គណ្ហិត្វាន, ទទេ ឆន្ទំ វិចក្ខណោ.

៤០១. (ក) ‘‘ឆន្ទំ ទម្មិ, ឆន្ទំ មេ ហរ, ឆន្ទំ មេ អារោចេហី’’តិ វត្តព្ពំ.

(ខ) បារិសុទ្ធិំ ទេន្តេន ‘‘បារិសុទ្ធិំ ទម្មិ, បារិសុទ្ធិំ មេ ហរ, បារិសុទ្ធិំ មេ អារោចេហី’’តិ វត្តព្ពំ.

៤០២. បារិសុទ្ធិប្បទានេន, សម្បាទេតិ ឧបោសថំ;

សង្ឃស្ស អត្តនោ ចាបិ, សេសកម្មំ វិពាធតិ.

៤០៣. ឆន្ទទានេន សង្ឃស្ស, ទ្វយំ សាធេតិ នត្តនោ;

តស្មា ឆន្ទំ ទទន្តេន, ទាតព្ពា បារិសុទ្ធិបិ.

៤០៤. ហរេយ្យេកោ ពហូនម្បិ, បរម្បរា ន ហារយេ;

បរម្បរាហដា ឆន្ទ-បារិសុទ្ធិ ន គច្ឆតិ.

៤០៥. សព្ពូបចារំ កត្វាន, ឯវំ ទេយ្យា បវារណា. ‘‘បវារណំ ទម្មិ, បវារណំ មេ ហរ, បវារណំ មេ អារោចេហិ, មមត្ថាយ បវារេហី’’តិ.

៤០៦. អារោចេត្វាថ សោ សង្ឃំ, បវារេយ្យេវមាគតោ. ‘‘ឥត្ថន្នាមោ, ភន្តេ, សង្ឃំ បវារេតិ ទិដ្ឋេន វា សុតេន វា បរិសង្កាយ វា, វទតុ តំ សង្ឃោ អនុកម្បំ ឧបាទាយ, បស្សន្តោ បដិករិស្សតី’’តិ.

៤០៧. គហេត្វា បារិសុទ្ធិំ វា, ឆន្ទំ វាបិ បវារណំ;

ហារកោ សង្ឃមប្បត្វា, វិព្ភមេយ្យ មរេយ្យ វា.

៤០៨. សាមណេរាទិភាវំ វា,

បដិជានេយ្យ នាហដា;

បត្វា សង្ឃំ តថា ហេយ្យ,

អាហដា ហោតិ ហារកោ.

៤០៩. សង្ឃប្បត្តោ បមត្តោ វា, សុត្តោ នារោចយេយ្យ វា;

អនាបត្តិវ សញ្ចិច្ច, នារោចេន្តស្ស ទុក្កដន្តិ.