៤០. អវេភង្គិយនិទ្ទេសោ

អវេភង្គិយន្តិ –

៣២២. អារាមារាមវត្ថូនិ, វិហារោ តស្ស វត្ថុ ច;

មញ្ចោ បីឋំ ភិសិ ពិព្ពោ-ហនាទិសយនាសនំ.

៣២៣. លោហកុម្ភី កដាហោ ច,

លោហភាណកវារកោ;

កុឋារី វាសិ ផរសុ,

កុទ្ទាលោ ច និខាទនំ.

៣២៤. វល្លិ វេឡុ តិណំ បណ្ណំ, មុញ្ជបព្ពជមត្តិកា;

ទារុមត្តិកភណ្ឌានិ, បញ្ចេតេ អវិភាជិយា.

៣២៥. ថុល្លច្ចយំ ភាជយតោ, ភាជិតាបិ អភាជិតា;

គរុភណ្ឌានិ វុច្ចន្តិ, ឯតេវិស្សជ្ជិយានិ ច.

៣២៦. វល្លិឌ្ឍពាហុមត្តាបិ, វេឡុ អដ្ឋង្គុលាយតោ;

តិណាទិ មុដ្ឋិមត្តម្បិ, បណ្ណំ ឯកម្បិ មត្តិកា.

៣២៧. បាកតា បញ្ចវណ្ណា វា, សុធាកង្គុដ្ឋ អាទិកា;

តាលបក្កប្បមាណាបិ, ទិន្នា វា តត្ថជាតកា.

៣២៨. រក្ខិតា សង្ឃិកា រជ្ជុ-យោត្តាទីបិ អភាជិយា;

និដ្ឋិតេ ភាជិយា កម្មេ, សង្ឃិកេ ចេតិយស្ស វា.

៣២៩. បត្តាទិ ភិក្ខុសារុប្បំ, តថា វិប្បកតាកតំ;

ភាជិយំ លោហភណ្ឌេសុ, វារកំ បាទគណ្ហកំ.

៣៣០. វេឡុម្ហិ ភាជិយា តេល-នាឡិ កត្តរទណ្ឌកោ;

ឆត្តទណ្ឌសលាកាយោ, តថោបាហនទណ្ឌកោ.

៣៣១. អនុញ្ញាតវាសិទណ្ឌោ, ករណ្ឌោ បាទគណ្ហកោ;

អរណញ្ជនិសិង្គាទិ, ភិក្ខូបករណំ តថា.

៣៣២. តច្ឆិតានិដ្ឋិតំ ទារុភណ្ឌំ ទន្តញ្ច ភាជិយំ;

ភិក្ខូបករណេ បាទឃដកោ មត្តិកាមយោ.

៣៣៣. ភាជិយំ កប្បិយំ ចម្មំ, ឯឡចម្មមភាជិយំ;

គរុនា គរុភណ្ឌញ្ច, ថាវរំ ថាវរេន ច.

៣៣៤. ថាវរំ បរិវត្តេយ្យ, តថា កត្វា ច ភុញ្ជតុ;

វល្លាទិំ ផាតិកម្មេន, គណ្ហេ សេសមភាជិយន្តិ.