៤១. បកិណ្ណកនិទ្ទេសោ

បកិណ្ណកន្តិ –

៣៣៥. សទ្វារពន្ធនេ ឋានេ, សោទុក្ខលកបាសកេ;

សយន្តេន ទិវា ទ្វារំ, ពន្ធេយ្យ បរិវដ្ដកំ.

៣៣៦. សន្តេ វិញ្ញុម្ហិ បុរិសេ, អាភោគោ ចាបិ កប្បតិ;

សវសេ តំ វិនាការំ, សយន្តោ ទុក្កដំ ផុសេ.

៣៣៧. រតនានិត្ថិរូបានិ, ធញ្ញមិត្ថិបសាធនំ;

តូរិយាវុធភណ្ឌានិ, អាមសន្តស្ស ទុក្កដំ.

៣៣៨. សិត្ថតេលោទតេលេហិ, ផណហត្ថផណេហិ វា;

កោច្ឆេនវាបិ យោ កេសេ, ឱសណ្ឋេយ្យស្ស ទុក្កដំ.

៣៣៩. នេកបាវុរណា ឯកត្ថរណា វា តុវដ្ដយុំ;

តថេកមញ្ចេ ភុញ្ជេយ្យុំ, ឯកស្មិំ វាបិ ភាជនេ.

៣៤០. ចតុរង្គុលតោ ឩនមធិកដ្ឋង្គុលំ តថា;

ទន្តកដ្ឋំ ន ខាទេយ្យ, លសុណំ ន អកល្លកោ.

៣៤១. ហីនុក្កដ្ឋេហិ ឧក្កដ្ឋំ, ហីនំ វា ជាតិអាទិហិ;

ឧជុំ វាញ្ញាបទេសេន, វទេ ទុព្ភាសិតំ ទវា.

៣៤២. ទីឃេ នខេ ច កេសេ ច, នាសលោមេ ន ធារយេ;

ន លព្ភំ វីសតិមដ្ឋំ, សម្ពាធេ លោមហារណំ.

៣៤៣. យថាវុឌ្ឍំ ន ពាធេយ្យ, សង្ឃុទ្ទិដ្ឋំវ សង្ឃិកំ;

អធោតអល្លបាទេហិ, នក្កមេ សយនាសនំ;

សុធោតបាទកំ វាបិ, តថេវ សឧបាហនោ.

៣៤៤. សង្ឃាដិយា ន បល្លត្ថេ, ភិត្តាទិំ ន អបស្សយេ;

បរិកម្មកតំ សន្តេ, ឧទកេ នោ ន អាចមេ.

៣៤៥. អកប្បិយសមាទានេ, ទវា សិលាបវិជ្ឈនេ;

ទេសនាយ សភាគាយ, អាវិកម្មេ ច ទុក្កដំ.

៣៤៦. បដិស្សវវិសំវាទេ, សុទ្ធចិត្តស្ស ទុក្កដំ;

បដិស្សវក្ខណេ ឯវ, បាចិត្តិ ឥតរស្ស តុ.

៣៤៧. ន រុក្ខមភិរូហេយ្យ, សតិ កិច្ចេវ បោរិសំ;

អាបទាសុ យថាកាមំ, កប្បតី អភិរូហិតុំ.

៣៤៨. វិនាទ្ធានំ វជន្តស្ស, ទុក្កដំ បរិសាវនំ;

យាចមានស្ស អទ្ធានេ, អទទន្តស្ស ទុក្កដំ.

៣៤៩. ថុល្លច្ចយំ ផុសេ អង្គជាតច្ឆេទេន ទុក្កដំ;

អាពាធប្បច្ចយាញ្ញត្រ, សេសង្គេ អត្តឃាតនេ.

៣៥០. ចិត្តបោត្ថករូបានិ, ន ករេ ន ច ការយេ;

ន វុដ្ឋាបេយ្យ ភុញ្ជន្តំ, អារាមារញ្ញគេហសុ.

៣៥១. យានានិ បុមយុត្តានិ, សិវិកំ ហត្ថវដ្ដកំ;

បាដង្កិញ្ច គិលានស្ស, កប្បតី អភិរូហិតុំ.

៣៥២. ពុទ្ធំ ធម្មញ្ច សង្ឃញ្ច, អារព្ភ ករណេ ទវំ;

ទុក្កដំ បរិសំ វាបិ, អញ្ញស្ស ឧបលាឡនេ.

៣៥៣. កាយំ ឩរុំ និមិត្តំ វា, ភិក្ខុនីនំ ន ទស្សយេ;

វិវរិត្វា ន សិញ្ចេយ្យ, តា កទ្ទមុទកាទិនា.

៣៥៤. ន គណ្ហតោ ច ឱវាទំ, ន បច្ចាហរតោបិ ច;

ពាលំ គិលានំ គមិយំ, វជ្ជយិត្វាន ទុក្កដំ.

៣៥៥. លោកាយតំ ន វាចេយ្យ, បលិតំ ន ច គាហយេ;

បេឡាយបិ ន ភុញ្ជេយ្យ, ន កីឡេ កិញ្ចិ កីឡិតំ.

៣៥៦. បារុបេ ន និវាសេយ្យ, គិហិបារុតនិវាសនំ;

សំវេល្លិយំ និវាសេយ្យ, ទាយំ នាលិម្បយេយ្យ វា.

៣៥៧. វឌ្ឍិំ បយោជយេ យាចេ, នោញ្ញាតកប្បវារិតេ;

អត្តនោ បរិភោគត្ថំ, ទិន្នមញ្ញស្ស នោ ទទេ;

អគ្គំ គហេត្វា ភុត្វា វា, កតិបាហំ បុនោ ទទេ.

៣៥៨. ឧទ្ទិស្ស យាចនេ រក្ខំ, ញត្វាញត្វា វ ទណ្ឌិនំ;

គីវាស្ស ទណ្ឌិតេ ទណ្ឌោ, សយំ ទណ្ឌាបនេ បន;

ទណ្ឌស្ស អគ្ឃភេទេន, ញេយ្យា បារាជិកាទិកា.

៣៥៩. ហរន្តេសុ បរិក្ខារំ, ‘‘ចោរោ ចោរោ’’តិ ភាសិតេ;

អនត្ថាយេសំ គណ្ហន្តេ, ទណ្ឌំ គីវាស្ស តត្តកំ.

៣៦០. វិឃាសុច្ចារសង្ការ-មុត្តំ ឆឌ្ឌេយ្យ ទុក្កដំ;

ពហិ បាការកុដ្ដានំ, វឡញ្ជេ នាវលោកិយ;

ហរិតេ វាបិ វីហាទិ-នាឡិកេរាទិរោបិមេ.

៣៦១. យោជាបេតុំ បយោជេតុំ, បយុត្តានិ ច បស្សិតុំ;

ន លព្ភំ ធម្មយុត្តម្បិ, នច្ចំ គីតញ្ច វាទិតំ;

‘‘ឧបហារំ ករោមា’’តិ, វុត្តេ វា សម្បដិច្ឆិតុំ.

៣៦២. រាជាគារំ បោក្ខរណិំ, ឧយ្យានំ ចិត្តគារកំ;

កីឡត្ថំ គច្ឆតោ ទដ្ឋុំ, អារាមំ ទុក្កដំ កតំ.

៣៦៣. នវេ ន បដិពាហេយ្យា-សនេនុណ្ហេ ន ចីវរំ;

និទហេយ្យ ខមាបេយ្យ, គរុនា ច បណាមិតោ.

៣៦៤. អក្កោសនេ បរម្មុខា, អាបត្តីហិ ច សត្តហិ;

ភិក្ខុំ ឧបាសកំ វាបិ, អញ្ញេនេវ ច ទុក្កដំ.

៣៦៥. ន លព្ភំ វិនិបាតេតុំ, សទ្ធាទេយ្យញ្ច ចីវរំ;

លព្ភំ បិតូនំ សេសានំ, ញាតីនម្បិ ន លព្ភតិ.

៣៦៦. វស្សំវុត្ថោញ្ញតោញ្ញត្រ, ភាគំ គណ្ហេយ្យ ទុក្កដំ;

បដិទេយ្យ នដ្ឋេ ជិណ្ណេ, គីវា នោ ទេយ្យ ចោទិតោ;

ធុរនិក្ខេបតោ តេសំ, ហោតិ ភណ្ឌគ្ឃការិយោ.

៣៦៧. ន សន្តរុត្តរោ គាមំ, កល្លោ វា សឧបាហនោ;

បវិសេយ្យ ន ធារេយ្យ, ចាមរីមកសពីជនិំ.

៣៦៨. អគិលានោ ន ឆិន្ទេយ្យ, កេសេ កត្តរិយា ពហិ;

អារាមតោ ន ធារេយ្យ, ឆត្តំ លព្ភតិ គុត្តិយា.

៣៦៩. គាហេយ្យ នុភតោកាជំ, ឯកន្តរិកកាជកំ;

សីសក្ខន្ធកដិភារា, ហត្ថោលម្ពោ ច លព្ភតិ.

៣៧០. អាបត្តិយា អនោកាស-កតំ ចោទេយ្យ ទុក្កដំ;

សុទ្ធស្ស ច អវត្ថុស្មិំ, តថា ឱកាសការណេ.

៣៧១. អដ្ឋង្គុលាធិកំ មញ្ចបដិបាទំ ន ធារយេ;

បកតង្គុលេន សត្តានំ, មញ្ចំ វា ឧច្ចបាទកំ.

៣៧២. មូគព្ពតាទិំ គណ្ហេយ្យ, ទុក្កដំ តិត្ថិយព្ពតំ;

ខុរភណ្ឌំ បរិហរេ, តថា ន្ហាបិតបុព្ពកោ.

៣៧៣. យំ កិញ្ចិ យាចិតុំ ហត្ថកម្មំ តទនុសារតោ;

លទ្ធំ គហេតុំ និក្កម្មមយាចិត្វាបិ កប្បតិ;

ការេតុមាហរាបេតុំ, យំ កិញ្ចិបរសន្តកំ.

៣៧៤. គិហីនំ គោបកេ ទេន្តេ, គហេតុំ ទេតិ យត្តកំ;

លព្ភំ យថាបរិច្ឆេទំ, សង្ឃចេតិយសន្តកេ.

៣៧៥. ទ្វីហាបជ្ជេយ្យ អាបត្តិំ, កាយវាចាហិ វា ឆហិ;

អលជ្ជិញ្ញាណកុក្កុច្ចបកតត្តា សតិប្លវា;

អកប្បិយេ វា កប្បិយេ, កប្បាកប្បិយសញ្ញិតា.

៣៧៦. អលជ្ជិញ្ញាណតាបត្តិំ, កាយវាចាហិ ឆាទយេ;

លិង្គេ សង្ឃេ គណេកស្មិំ, ចតុធាបត្តិវុដ្ឋិតិ.

៣៧៧. បរិកថោភាសវិញ្ញត្តិ, ន លព្ភា បច្ចយទ្វយេ;

វិញ្ញត្តិយេវ តតិយេ, សេសេ សព្ពម្បិ លព្ភតិ.

៣៧៨. ន រូហតច្ចយេ ទានំ, បញ្ចន្នំ សហធម្មិនំ;

សង្ឃស្សេវ ច តំ ហោតិ, គិហីនំ បន រូហតិ.

៣៧៩. ភិក្ខុ វា សាមណេរោ វា, កាលំ កយិរាថូបស្សយេ;

ភិក្ខុសង្ឃោវ ទាយជ្ជោ, តត្ថ សេសេប្យយំនយោ.

៣៨០. បុរិមស្សេវិមំ ទិន្នំ, ទេហិ នេត្វាសុកស្សតិ;

បច្ឆិមស្សេវ ទម្មីតិ, ទិន្នំ ញត្វា ឥមំ វិធិំ;

គណ្ហេ វិស្សាសគាហំ វាធិដ្ឋេ មតកចីវរំ.

៣៨១. លោហភណ្ឌេ បហរណិំ, ទារុភណ្ឌេ ច ទារុជំ;

បត្តំ បាទុកបល្លង្កំ, អាសន្ទិំ មត្តិកាមយេ;

ឋបេត្វា កប្បតិ សព្ពំ, កតកំ កុម្ភការិកន្តិ.