៣៩. វស្សូបនាយិកនិទ្ទេសោ

វស្សូបនាយិកា ចេវាតិ –

៣០៩. បុរិមិកា បច្ឆិមិកា, ទុវេ វស្សូបនាយិកា;

តត្ថាលយបរិគ្គាហោ, វចីភេទោ ច ឯទិសោ.

៣១០. ‘‘ឥមស្មិំ វិហារេ ឥមំ, តេមាសំ វស្សំ ឧបេមិ;

ឥធ វស្សំ ឧបេមី’’តិ, ចិត្តុប្បាទេត្ថ អាលយោ.

៣១១. នោបេតុកាមោ អាវាសំ, តទហូតិក្កមេយ្យ វា;

ភវេយ្យ ទុក្កដាបត្តិ, ជានំ វានុបគច្ឆតោ.

៣១២. ទុតិយំ ឧបគច្ឆេយ្យ, ឆិន្នវស្សោនុបាគតោ;

ន បក្កមេយ្យ តេមាសំ, អវសិត្វាន ចារិកំ.

៣១៣. មាតាបិតូនមត្ថាយ, បញ្ចន្នំ សហធម្មិនំ;

គិលានតទុបដ្ឋាក-ភត្តមេសិស្សមោសធំ.

៣១៤. បុច្ឆិស្សាមិ ឧបដ្ឋិស្សំ, គន្ត្វានភិរតំ អហំ;

វូបកាសិស្សំ កុក្កុច្ចំ, ទិដ្ឋិំ គរុកមាទិកំ.

៣១៥. ករិស្សំ វាបិ ការេស្សំ, វិនោទនំ វិវេចនំ;

វុដ្ឋានំ វាបិ ឧស្សុក្កំ, គន្តុមិច្ចេវមាទិនា;

លព្ភំ សត្តាហកិច្ចេន, បហិតាបហិតេបិ វា.

៣១៦. សង្ឃកម្មេ វជេ ធម្ម-ស្សវនត្ថំ និមន្តិតោ;

គរូហិ បហិតោ វាបិ, គរូនំ វាបិ បស្សិតុំ.

៣១៧. ន ភណ្ឌធោវនុទ្ទេស-ញាតុបដ្ឋាកទស្សនេ;

លព្ភំ ន បាបុណេយ្យជ្ជេ-វាគមិស្សន្តុទូរគោ.

៣១៨. សេសញាតីហិ បហិតេ, ភិក្ខុនិស្សិតកេន ច;

ឧបាសកោបាសិកាហិ, និទ្ទិសិត្វាវ បេសិតេ.

៣១៩. វស្សច្ឆេទេ អនាបត្តិ, អន្តរាយេ សតត្តនោ;

សង្ឃសាមគ្គិយា វា នោ, ឆិន្នវស្សោ បវារយេ.

៣២០. អជ្ឈោកាសេ ច រុក្ខស្ស, សុសិរេ វិដបេបិ វា;

ឆវកុដិឆត្តចាដី-សូបគន្តុំ ន វដ្ដតិ.

៣២១. អសេនាសនិកេនាបិ, ឧបគន្តុំ ន លព្ភតិ;

បវារេតុញ្ច លព្ភតិ, នាវាសត្ថវជូបគោតិ.