៣៨. កុលទូសននិទ្ទេសោ

ទូសនន្តិ –

២៩៧. បុប្ផំ វេឡុំ ផលំ ចុណ្ណំ, ទន្តកដ្ឋញ្ច មត្តិកំ;

សង្គហណត្ថំ ទទតោ, កុលទូសនទុក្កដំ.

២៩៨. ថុល្លច្ចយំ គរុភណ្ឌំ, ឥស្សរេនេត្ថ សង្ឃិកំ;

ទេន្តស្ស ទុក្កដាទីនិ, ថេយ្យា សង្ឃញ្ញ សន្តកំ.

២៩៩. កុលសង្គហា រោបេតុំ, រោបាបេតុញ្ច សព្ពថា;

ផលបុប្ផូបគំ រុក្ខំ, ជគ្គិតុញ្ច ន វដ្ដតិ.

៣០០. និមិត្តោភាសតោ កប្បវោហារបរិយាយតោ;

អត្តនោ បរិភោគត្ថំ, រោបនាទីនិ លព្ភរេ.

៣០១. វុត្តាវ វេជ្ជិកា ជង្ឃបេសនេ គិហិកម្មសុ;

ឋបេត្វា បិតរោ ភណ្ឌុំ, វេយ្យាវច្ចករំ សកំ.

៣០២. ទុក្កដំ បទវារេន, ហរណេ ទូតសាសនំ;

សាសនំ អគ្គហេត្វាបិ, បឋមំ វទតោ បុន.

៣០៣. ឧប្បន្នបច្ចយា ឯវំ, បញ្ចន្នម្បិ អកប្បិយា;

អភូតារោចនារូប-សំវោហារុគ្គហាទិសា.

៣០៤. ហរាបេត្វា ហរិត្វាបិ, បិតូនំ សេសញាតិនំ;

បត្តានំ វត្ថុបូជត្ថំ, ទាតុំ បុប្ផានិ លព្ភតិ;

មណ្ឌនត្ថញ្ច លិង្គាទិ-បូជត្ថញ្ច ន លព្ភតិ.

៣០៥. តថា ផលំ គិលានានំ, សម្បត្តិស្សរិយស្ស ច;

បរិព្ពយវិហីនានំ, ទាតុំ សបរសន្តកំ.

៣០៦. ភាជេន្តេ ផលបុប្ផម្ហិ, ទេយ្យំ បត្តស្ស កស្សចិ;

សម្មតេនាបលោកេត្វា, ទាតព្ពមិតរេន តុ.

៣០៧. វិហារេ វា បរិច្ឆិជ្ជ, កត្វាន កតិកំ តតោ;

ទេយ្យំ យថាបរិច្ឆេទំ, គិលានស្សេតរស្ស វា;

យាចមានស្ស កតិកំ, វត្វា រុក្ខាវ ទស្សិយា.

៣០៨. សិរីសកសវាទីនំ, ចុណ្ណេ សេសេ ច និច្ឆយោ;

យថាវុត្តនយោ ឯវ, បណ្ណម្បេត្ថ បវេសយេតិ.