៣៧. ឧគ្គហនិទ្ទេសោ

ឧគ្គហោតិ –

២៨១. កម្មចេតិយសង្ឃញ្ញ-បុគ្គលត្ថំ គណស្ស ច;

ទសភេទម្បិ រតនំ, ឧគ្គណ្ហន្តស្ស ទុក្កដំ.

២៨២. និស្សគ្គិ តេសុ អត្តត្ថំ, ទ្វីសុ សេសេសុ ទុក្កដំ;

អនាមសិត្វា វុត្តេ តុ, គណំ សង្ឃញ្ច បុគ្គលំ.

២៨៣. ‘‘ចេត្យស្ស នវកម្មស្ស, ទម្មី’’តិ ន បដិក្ខិបេ;

វទេ កប្បិយការានំ, ‘‘វទន្តេវមិមេ’’ ឥតិ.

២៨៤. ខេត្តំ វត្ថុំ តឡាកំ វា, ទេន្តេ ទាសបស្វាទិកំ;

បដិក្ខិបិត្វា គណ្ហេយ្យ, កប្បិយេន កមេន ច;

ខេត្តាទីនិ វិហារស្ស, វុត្តេ ទម្មីតិ វដ្ដតិ.

២៨៥. នវមាតិកកេទារ-តឡាកកិរិយានវេ;

មត្តិកុទ្ធរណំ ពន្ធោ, ថិរការោ ច អាឡិយា.

២៨៦. តិរេកភាគគហណំ, កេទារេ អនវេ នវេ;

អបរិច្ឆន្នភាគេ ច, សស្សេ ‘‘ទេថេត្តកេ’’ ឥតិ;

កហាបណុដ្ឋាបនញ្ច, សព្ពេសម្បិ អកប្បិយំ.

២៨៧. អវត្វា កស វប្បិច្ចាទេត្តិកាយ ច ភូមិយា;

បតិដ្ឋាបេតិ ភូមិំ វា, ភាគោ ទេយ្យោតិ ឯត្តកោ.

២៨៨. ភូមិភាគេ កតំ សស្សំ, ឯត្តកេ គណ្ហថេត្តកំ;

គណ្ហនត្ថំ វទន្តេវំ, បមាណំ ទណ្ឌរជ្ជុភិ.

២៨៩. មិននេ រក្ខណេ ឋត្វា, ខលេ តំនីហរាបនេ;

កោដ្ឋាទិបដិសាមនេ, តស្សេវេតមកប្បិយំ.

២៩០. បដិសាមេយ្យ បាចិត្តិ, យំ កិញ្ចិ គិហិសន្តកំ;

ភណ្ឌាគារិកសីសេន, សចេបិ បិតុសន្តកំ.

២៩១. បិតូនំ កប្បិយំ វត្ថុំ, អវស្សំ បដិសាមិយំ;

អត្តនោ សន្តកំ កត្វា, លព្ភតេ បដិសាមិតុំ.

២៩២. ទេហីតិ បដិសាមេត្វា, វុត្តេ ចាបិ បដិក្ខិបេ;

បាតេត្វាន គតេ លព្ភំ, បលិពោធោតិ គោបិតុំ.

២៩៣. កម្មំ ករោន្តោ អារាមេ, សកំ វឌ្ឍកិអាទយោ;

បរិក្ខារញ្ច សយន-ភណ្ឌំ វា រាជវល្លភា.

២៩៤. ទេហីតិ បដិសាមេត្វា, វទន្តិ យទិ ឆន្ទតោ;

ន ករេយ្យ ភយា ឋានំ, គុត្តំ ទស្សេតុ វដ្ដតិ.

២៩៥. ពលក្ការេន បាតេត្វា, គតេសុ បដិសាមិតុំ;

ភិក្ខុំ មនុស្សា សង្កន្តិ, នដ្ឋេ វត្ថុម្ហិ តាទិសេ.

២៩៦. វិហារាវសថស្សន្តោ, រតនំ រត្នសម្មតំ;

និក្ខិបេយ្យ គហេត្វាន, មគ្គេរញ្ញេបិ តាទិសេ;

សាមិកានាគមំ ញត្វា, បតិរូបំ ករីយតីតិ.