៣៥. បរិក្ខារនិទ្ទេសោ

បរិក្ខារោតិ –

២៥៩. បញ្ចវណ្ណេហិ សុត្តេហិ, អន្តោ ពហិ ច សិព្ពិតុំ;

គិរិកូដឌ្ឍចន្ទាទិំ, ឆត្តេ បណ្ណេ ច ឆិន្ទិតុំ.

២៦០. ឃដកំ វាឡរូបំ វា, ទណ្ឌេ លេខា ន វដ្ដតិ;

វដ្ដតី ទណ្ឌពុន្ទម្ហិ, អហិច្ឆត្តកសាទិសំ.

២៦១. សិព្ពិតុំ ឯកវណ្ណេន, បញ្ជរំ វា វិនន្ធិតុំ;

ថិរត្ថំ វដ្ដតី ឆត្តេ, ទណ្ឌេ លេខាវ ពន្ធិតុំ.

២៦២. អន្តេ បដ្ដមុខេ វាបិ, វេណិ សង្ខលិកាបិ វា;

សូចិវិការមញ្ញំ វា, ចីវរេ ន ច កប្បតិ;

កប្បពិន្ទុវិការម្បិ, បាឡិកណ្ណិកអាទិកំ.

២៦៣. គណ្ឋិបាសកបដ្ដាបិ, ចតុក្កោណាវ អគ្ឃិយំ;

មុគ្គរោ កក្កដច្ឆាទិ-វិការំ នេត្ថ វដ្ដតិ.

២៦៤. កោណសុត្តា ច បីឡកា, ទុវិញ្ញេយ្យាវ កប្បរេ;

គន្ធំ តេលំ វ លាខំ វា, រជនេ ន ច បក្ខិបេ.

២៦៥. រត្តំ សង្ខេន មណិនា, ឃដ្ដេយ្យញ្ញេន វា ន ច;

ឃំសេយ្យ ទោណិយំ កត្វា, បហារេ ន ច មុដ្ឋិនា.

២៦៦. កណ្ណកោណកសុត្តានិ, រត្តេ ឆិន្ទេយ្យ ចីវរេ;

លេខា ន វដ្ដតី ធម្ម-ករណេ ឆត្តវដ្ដិយំ.

២៦៧. លេខំ ឋបេត្វា មណិកា, បីឡកា កុញ្ចិកាយ ច;

បិប្ផលេ ច បរិច្ឆេទ-លេខា ទណ្ឌម្ហិ វដ្ដតិ.

២៦៨. មាលាទ្យរណិយំ បត្ត-មណ្ឌលេ ភិត្តិកម្ម ច;

ហេដ្ឋា លេខាទ្វយំ ឧទ្ធំ, អហិច្ឆត្តកសាទិសំ.

២៦៩. ហិត្វា កត្តរយដ្ឋិម្ហិ, សូចិសណ្ឌាសកេបិ ច;

យំ កិញ្ចិ គិរិកូដាទិ-វណ្ណមដ្ឋំ ន វដ្ដតិ.

២៧០. ពិម្ពោហនេ ភិសិមញ្ច-បីឋាទិសយនាសនេ;

សម្មុញ្ជនិម្ហិ សង្ការ-ឆឌ្ឌនេ រង្គភាជនេ.

២៧១. បានីយភាជនេ បាទ-បីឋេ កថលិកាយ ច;

បត្តាធារបិធានេសុ, តាលវណ្ដេ ច ពីជនេ;

យំ កិញ្ចិ មាលាកម្មាទិ-វណ្ណមដ្ឋមវារិតំ.

២៧២. សេនាសនេ បន ទ្វារកវាដាទិប្បភេទនេ;

សោវណ្ណមយនុញ្ញាតំ, វណ្ណមដ្ឋម្ហិ កា កថា.

២៧៣. វិសាណនាឡិលាព្វាទិប្បភេទេ តេលភាជនេ;

បុមិត្ថិរូបរហិតំ, វណ្ណមដ្ឋមវារិតន្តិ.