៣៤. បថវីនិទ្ទេសោ

បថវី ចាតិ –

២៤២. ជាតាជាតាតិ ទុវិធា, សុទ្ធមត្តិកបំសុកា;

ជាតាទឌ្ឍា ច បថវី, ពហុមត្តិកបំសុកា;

ចាតុមាសាធិកោវដ្ឋបំសុមត្តិករាសិ ច.

២៤៣. សុទ្ធសក្ខរបាសាណមរុម្ពកថលវាលុកា;

ទឌ្ឍា ច ភូមិ យេភុយ្យសក្ខរាទិមហីបិ ច;

ទុតិយា វុត្តរាសិ ច, ចាតុមាសោមវដ្ឋកោ.

២៤៤. ទ្វេ ភាគា តីសុ ភាគេសុ, មត្តិកា យស្ស ភូមិយា;

យេភុយ្យមត្តិកា ឯសា, សេសេសុបិ អយំ នយោ.

២៤៥. បាចិត្តិ ខណនេ ជាតេ, ជាតសញ្ញិស្ស ទុក្កដំ;

ទ្វេឡ្ហស្សាជាតសញ្ញិស្ស, នាបត្តាណាបនេ តថា.

២៤៦. បហារេ បហារាបត្តិ, ខណមានស្ស អត្តនា;

ឯកាយាណត្តិយា ឯកា, នានាណត្តីសុ វាចសោ.

២៤៧. ‘‘ឥមំ ឋានមិមំ កន្ទមិធ វាបិំ ខណេត្ថ ច;

ជាលេហគ្គិ’’ន្តិ វា វត្តុំ, និយមេត្វា ន វដ្ដតិ.

២៤៨. ‘‘ថម្ភស្សិមស្សាវាដំ វា, មត្តិកំ ជាន មាហរ;

ករោហិ កប្បិយញ្ចេ’’តិ, វចនំ វដ្ដតេទិសំ.

២៤៩. អសម្ពទ្ធំ បថវិយា, សុក្ខកទ្ទមអាទិកំ;

កោបេតុំ តនុកំ លព្ភមុស្សិញ្ចនីយកទ្ទមំ.

២៥០. គណ្ឌុប្បាទំ ឧបចិកាមត្តិកំ មូសិកុក្កិរំ;

ចាតុមាសាធិកោវដ្ឋំ, លេឌ្ឌាទិញ្ច ន កោបយេ.

២៥១. បតិតេ វាបិអាទីនំ, កូលេ ឧទកសន្តិកេ;

បាសាណេ ច រជេ លគ្គេ, បតិតេ នវសោណ្ឌិយា.

២៥២. វម្មិកេ មត្តិកាកុដ្ដេ, អព្ភោកាសុដ្ឋិតេ តថា;

យេភុយ្យកថលដ្ឋានេ, តិដ្ឋតិដ្ឋកកុដ្ដកោ.

២៥៣. ថម្ភាទិំ គណ្ហិតុំ ភូមិំ, សញ្ចាលេត្វា វិកោបយំ;

ធារាយ ភិន្ទិតុំ ភូមិំ, កាតុំ វា វិសមំ សមំ.

២៥៤. សម្មុញ្ជនីហិ ឃំសិតុំ, កណ្ដកាទិំ បវេសិតុំ;

ទស្សេស្សាមីតិ ភិន្ទន្តោ, ភូមិំ ចង្កមិតុំ បទំ.

២៥៥. ឃំសិតុំ អង្គបច្ចង្គំ, កណ្ឌុរោគី តដាទិសុ;

ហត្ថំ វា ធោវិតុំ ភូមិំ, ឃំសិតុំ ន ច កប្បតិ.

២៥៦. ថម្ភាទិឧជុកុទ្ធារោ, បាសាណាទិបវដ្ដនំ;

សាខាទិកឌ្ឍនំ រុក្ខលតាច្ឆេទនផាលនំ.

២៥៧. សេកោ បស្សាវអាទីនំ, សុទ្ធចិត្តស្ស វដ្ដតិ;

អល្លហត្ថំ ឋបេត្វាន, រជគ្គាហោ ច ភូមិយា.

២៥៨. អគ្គិស្ស អនុបាទានេ, កបាលេ ឥដ្ឋកាយ វា;

បាតេតុំ លព្ភតេ អគ្គិំ, ភូមិយំ វាវសេ សតីតិ.