៣១. វិកប្បនានិទ្ទេសោ

វិកប្បនា ចេវាតិ –

២២១. សម្មុខា បរម្មុខាតិ, ទុវេ វុត្តា វិកប្បនា;

សម្មុខាយ វិកប្បេន្តោ, ព្យត្តស្សេកស្ស សន្តិកេ;

‘‘ឥមំ ចីវរំ តុយ្ហំ, វិកប្បេមី’’តិ ភាសយេ.

២២២. ឯត្តាវតា និធេតុំវ, កប្បតី ន ច កប្បតិ;

បរិភោគាទិកំ តេន, អប្បច្ចុទ្ធដភាវតោ.

២២៣. ‘‘មយ្ហំ សន្តកំ បរិភុញ្ជ វា វិស្សជ្ជេហិ វា យថាបច្ចយំ វា ករោហី’’តិ –

តេន បច្ចុទ្ធដេយេវ, បរិភោគាទិ កប្បតិ.

២២៤. អបរា សម្មុខាវេកា, ភិក្ខុស្សេកស្ស សន្តិកេ;

គហេត្វា នាមមេកស្ស, បញ្ចន្នំ សហធម្មិនំ.

២២៥. ‘‘ឥមំ ចីវរំ តិស្សស្ស ភិក្ខុនោ, តិស្សាយ ភិក្ខុនិយា, តិស្សស្ស សាមណេរស្ស, តិស្សាយ សាមណេរិយា, តិស្សាយ សិក្ខមានាយ វិកប្បេមី’’តិ វត្តព្ពំ.

តេន ភិក្ខុនា ‘‘តិស្សស្ស ភិក្ខុនោ, តិស្សាយ ភិក្ខុនិយា, តិស្សស្ស សាមណេរស្ស, តិស្សាយ សាមណេរិយា, តិស្សាយ សិក្ខមានាយ សន្តកំ បរិភុញ្ជ វា វិស្សជ្ជេហិ វា យថាបច្ចយំ វា ករោហី’’តិ វត្តព្ពំ.

២២៦. បរម្មុខាវិកប្បនេ-កស្សន្តិកេវមីរយេ;

‘‘ឥមំ ចីវរំ តុយ្ហំ វិកប្បនត្ថាយ ទម្មី’’តិ.

២២៧. តេន វត្តព្ពោ ‘‘កោ តេ មិត្តោ វា សន្ទិដ្ឋោ វា’’តិ. ឥតរេន ចេវំ វត្តព្ពំ ‘‘តិស្សោ ភិក្ខូ’’តិ វា ‘‘តិស្សា ភិក្ខុនី’’តិ វា ‘‘តិស្សោ សាមណេរោ’’តិ វា ‘‘តិស្សា សាមណេរី’’តិ វា ‘‘តិស្សា សិក្ខមានា’’តិ វា.

បុន តេន ‘‘អហំ តិស្សស្ស តិស្សាយ វា ទម្មី’’តិ វិកប្បេត្វា តេនេវ ‘‘តិស្សស្ស ភិក្ខុនោ, តិស្សាយ ភិក្ខុនិយា, តិស្សស្ស សាមណេរស្ស, តិស្សាយ សាមណេរិយា, តិស្សាយ សិក្ខមានាយ សន្តកំ បរិភុញ្ជ វា វិស្សជ្ជេហិ វា យថាបច្ចយំ វា ករោហី’’តិ បច្ចុទ្ធរិតព្ពំ.

២២៨. ទូរសន្តិកត្តេកត្តពហុភាវំ វិជានិយ;

‘‘ឯតំ ឥម’’ន្តិ ‘‘ឯតានិ, ឥមានី’’តេត្ថ យោជយេ.

២២៩. ទសាហំ មាសមេកំ វា, បញ្ច វា កថិនត្ថតេ;

បារិបូរត្ថមូនស្ស, បច្ចាសា សតិ មាសកំ;

នុប្បាទយតិ និស្សគ្គិំ, នាធិដ្ឋិតវិកប្បិតន្តិ.