៣២. និស្សយនិទ្ទេសោ

និស្សយោតិ –

២៣០. ព្យត្តស្ស បញ្ចវស្សស្ស, នត្ថិ និស្សយ ការិយំ;

យាវជីវម្បិ អព្យត្តោ, និស្សិតោយេវ ជីវតិ.

២៣១. ឯកំសំ ចីវរំ កត្វា, បគ្គណ្ហិត្វាន អញ្ជលិំ;

ឧក្កុដិកំ និសីទិត្វា, វទេ យាវតតីយកំ;

‘‘អាចរិយោ មេ, ភន្តេ, ហោហិ,

អាយស្មតោ និស្សាយ វច្ឆាមី’’តិ.

២៣២. បក្កន្តេ បក្ខសង្កន្តេ, វិព្ភន្តេ វាបិ និស្សយោ;

មរណាណត្តុបជ្ឈាយ-សមោធានេហិ សម្មតិ.

២៣៣. និស្សាយ ន វសេលជ្ជិំ, អបុព្ពំ ឋានមាគតោ;

អាគមេ ចតុបញ្ចាហំ, ញាតុំ ភិក្ខុសភាគតំ.

២៣៤. អទ្ធិកស្ស គិលានស្ស, គិលានុបដ្ឋកស្ស ច;

យាចិតស្ស អរញ្ញេ វា, សល្លក្ខន្តេន ផាសុកំ;

សភាគេ ទាយកេសន្តេ, វសិតុំ តាវ លព្ភតីតិ.