៣០. វត្តនិទ្ទេសោ

វត្តន្តិ –

២១៣. អាគន្តុកោ ន អារាមំ, បវិសេ សឧបាហនោ;

សឆត្តោគុណ្ឋិតោ សីសេ, ករិត្វា វាបិ ចីវរំ.

២១៤. បានីយេន ន ធោវេយ្យ, បាទេ វុឌ្ឍតរេបិ ច;

អាវាសិកេភិវាទេយ្យ, បុច្ឆេយ្យ សយនាសនំ.

២១៥. គមិកោ បដិសាមេត្វា, ទារុមត្តិកភណ្ឌកំ;

វិហារញ្ច ថកេត្វាន, អាបុច្ឆ សយនាសនំ.

២១៦. អាបុច្ឆិតព្ពេ អសតិ, សំគោបេត្វាន សាធុកំ;

បក្កមេយ្យញ្ញថា តស្ស, បក្កន្តុំ ន ច កប្បតិ.

២១៧. អាវាសិកោ បញ្ញាបេយ្យ, វុឌ្ឍាគន្តុស្ស អាសនំ;

ឧបនិក្ខិបេ បាទោទ-ប្បភុតិំ បត្តចីវរំ.

២១៨. បច្ចុគ្គន្ត្វាន គណ្ហេយ្យ, បានីយេន ច បុច្ឆយេ;

អាគន្តុកេភិវាទេយ្យ, បញ្ញបេ សយនាសនំ.

២១៩. អជ្ឈាវុត្ថមវុត្ថំ វា, គោចរាគោចរំ វទេ;

វច្ចបស្សាវឋានានិ, កតិកំ សេក្ខសម្មុតិំ.

២២០. បវេសនិក្ខមេ កាលំ, បរិភោជិយបានិយំ;

និសិន្នោវ នវកស្ស, ឯតំ សព្ពំ សមុទ្ទិសេតិ.