១៤. ភូមិនិទ្ទេសោ

ភូមិយោតិ –

១៣៦. សម្មុតុស្សាវនន្តា ច, គោនិសាទី គហាបតិ;

កប្បិយា ភូមិយោ យាសុ, វុត្ថំ បក្កញ្ច កប្បតិ.

១៣៧. វាសត្ថាយ កតេ គេហេ, សង្ឃិកេ វេកសន្តកេ;

កប្បិយា កុដិ លទ្ធព្ពា, សហសេយ្យប្បហោនកេ.

១៣៨. គេហេ សង្ឃស្ស វេកស្ស, ករមានេវមីរយំ;

បឋមិដ្ឋកថម្ភាទិំ, ឋបេយ្យុស្សាវនន្តិកា;

‘‘កប្បិយកុដិំ ករោម, កប្បិយកុដិំ ករោមា’’តិ.

១៣៩. យេភុយ្យេនាបរិក្ខិត្តោ, អារាមោ សកលោបិ វា;

វុច្ចតេ ‘‘គោនិសាទី’’តិ, សម្មុតី សង្ឃសម្មតា.

១៤០. ភិក្ខុំ ឋបេត្វា អញ្ញេហិ, ទិន្នោ តេសំវ សន្តកោ;

អត្ថាយ កប្បកុដិយា, គេហោ គហបតី មតោ.

១៤១. អកប្បកុដិយា វុត្ថសប្បិអាទីហិ មិស្សិតំ;

វជេយ្យ អន្តោវុត្ថត្តំ, បុរិមំ កាលិកទ្វយំ.

១៤២. តេហេវ ភិក្ខុនា បក្កំ, កប្បតេ យាវជីវិកំ;

និរាមិសំវ សត្តាហំ, សាមិសេ សាមបាកតា.

១៤៣. ឧស្សាវនន្តិកា យេហិ, ថម្ភាទីហិ អធិដ្ឋិតា;

តេសុយេវាបនីតេសុ, តទញ្ញេសុបិ តិដ្ឋតិ.

១៤៤. សព្ពេសុ អបនីតេសុ, ភវេ ជហិតវត្ថុកា;

គោនិសាទី បរិក្ខិត្តេ, សេសា ឆទនវិព្ភមាតិ.