១៥. ឧបជ្ឈាចរិយវត្តនិទ្ទេសោ

ឧបជ្ឈាចរិយវត្តានីតិ –

១៤៥. និស្សាយុបជ្ឈាចរិយេ, វសមានោ សុបេសលោ;

ទន្តកដ្ឋាសនំ តោយំ, យាគុំ កាលេ ទទេ សទា.

១៤៦. បត្តេ វត្តំ ចរេ គាម-ប្បវេសេ គមនាគមេ;

អាសនេ បាទបីឋេ ច, កថលោបាហនចីវរេ.

១៤៧. បរិភោជនីយបានីយ-វច្ចប្បស្សាវឋានិសុ;

វិហារសោធនេ វត្តំ, បុន បញ្ញាបនេ តថា.

១៤៨. ន បប្ផោដេយ្យ សោធេន្តោ, បដិវាតេ ច សង្គណេ;

វិហារំ ភិក្ខុ បានីយ-សាមន្តា សយនាសនំ.

១៤៩. ន្ហានេ ន្ហាតស្ស កាតព្ពេ, រង្គបាកេ ច ធោវនេ;

សិព្ពនេ ចីវរេ ថេវេ, រជន្តោ ន វជេ ឋិតេ.

១៥០. ឯកច្ចស្ស អនាបុច្ឆា, បត្តំ វា ចីវរានិ វា;

ន ទទេយ្យ ន គណ្ហេយ្យ, បរិក្ខារញ្ច កិញ្ចនំ.

១៥១. ឯកច្ចំ បច្ឆតោ កាតុំ, គន្តុំ វា តស្ស បច្ឆតោ;

បិណ្ឌបាតញ្ច និន្នេតុំ, នីហរាបេតុមត្តនោ.

១៥២. កិច្ចយំ បរិកម្មំ វា, កេសច្ឆេទញ្ច អត្តនោ;

ការាបេតុំ វ កាតុំ វា, អនាបុច្ឆា ន វដ្ដតិ.

១៥៣. គាមំ សុសានំ និស្សីមំ, ទិសំ វា គន្តុមិច្ឆតោ;

អត្តនោ កិច្ចយំ វាបិ, អនាបុច្ឆា ន វដ្ដតិ.

១៥៤. ឧប្បន្នំ អរតិំ ទិដ្ឋិំ, កុក្កុច្ចំ វា វិនោទយេ;

ករេយ្យ វាបិ ឧស្សុក្កំ, សង្ឃាយត្តេសុ កម្មសុ.

១៥៥. គិលានេសុ ឧបដ្ឋេយ្យ, វុដ្ឋានំ នេសមាគមេ;

វត្តភេទេន សព្ពត្ថ, អនាទរេន ទុក្កដន្តិ.