១៣. សមណកប្បនិទ្ទេសោ

សមណកប្បាតិ –

១២៥. ភូតគាមសមារម្ភេ, បាចិត្តិ កតកប្បិយំ;

នខេន វាគ្គិសត្ថេហិ, ភវេ សមណកប្បិយំ.

១២៦. ស មូលខន្ធពីជគ្គ-ផឡុពីជប្បភាវិតោ;

អារម្ភេ ទុក្កដំ ពីជំ, ភូតគាមវិយោជិតំ.

១២៧. និព្ពដ្ដពីជំ នោពីជ-មកតញ្ចាបិ កប្បតិ;

កដាហពទ្ធពីជានិ, ពហិទ្ធា វាបិ ការយេ.

១២៨. ឯកាពទ្ធេសុ ពីជេសុ, ភាជនេ វាបិ ភូមិយំ;

កតេ ច កប្បិយេកស្មិំ, សព្ពេស្វេវ កតំ ភវេ.

១២៩. និក្ខិត្តេ កប្បិយំ កត្វា, មូលបណ្ណានិ ជាយរុំ;

កប្បិយំ បុន ការេយ្យ, ភូតគាមោ ហិ សោ តទា.

១៣០. សបណ្ណោ វា អបណ្ណោ វា, សេវាលោទកសម្ភវោ;

ចេតិយាទីសុ សេវាលោ, និព្ពដ្ដទ្វត្តិបត្តកោ;

ភូតគាមោវ ពីជម្បិ, មូលបណ្ណេ វិនិគ្គតេ.

១៣១. ឃដាទិបិដ្ឋេ សេវាលោ, មកុឡំ អហិឆត្តកំ;

ទុក្កដស្សេវ វត្ថូនិ, ផុល្លមព្យវហារិកំ.

១៣២. លាខានិយ្យាសឆត្តានិ, អល្លរុក្ខេ វិកោបិយ;

គណ្ហតោ តត្ថ បាចិត្តិ, ឆិន្ទតោ វាបិ អក្ខរំ.

១៣៣. បីឡេតុំ នាឡិកេរាទិំ, ទារុមក្កដកាទិនា;

ឆិន្ទិតុំ គណ្ឋិកំ កាតុំ, តិណាទិំ ន ច កប្បតិ.

១៣៤. ភូតគាមំ វ ពីជំ វា, ឆិន្ទ ភិន្ទោចិនាហិ វា;

ផាលេហិ វិជ្ឈ បច វា, និយមេត្វា ន ភាសយេ.

១៣៥. ឥមំ ករោហិ កប្បិយំ, ឥមំ គណ្ហេទមាហរ;

ឥមំ ទេហិ ឥមំ សោធេហេវំ វដ្ដតិ ភាសិតុន្តិ.