៤. បុរាណចីវរសិក្ខាបទវណ្ណនា

‘‘សាកិយានិយោ វិយ សុទ្ធភិក្ខុសង្ឃេ វា’’តិ ឥទំ ‘‘ភិក្ខុនី នាម ឧភតោសង្ឃេ ឧបសម្បន្នា’’តិ (បារា. ៥០៥) ឥមិនា វិរុជ្ឈតីតិ ចេ? ន, អធិប្បាយាជាននតោ. ភិក្ខូនំ សន្តិកេ ឧបសម្បទាយ បដិក្ខិត្តត្តា តទនុប្បសង្គភយា ឯវំ វុត្តន្តិ វេទិតព្ពំ.

ឯកេន វត្ថុនាតិ យេន កេនចិ បឋមេន. អវុត្តា វា ធោវតីតិ អវុត្តា ធោវតិ, រជតិ អាកោដេតីតិ អត្ថោ. ‘‘‘អវុត្តា’តិ វចនតោ អវាទាបេត្វា ធោវនាទីសុ អនាបត្តី’’តិ លិខិតំ. ឥធ ចីវរំ នាម និវាសនបារុបនូបគមេវ. យទិ ឯវំ ‘‘និវាសនបារុបនូបគមេវ វត្តព្ព’’ន្តិ ចេ? តំ ន វត្តព្ពំ ‘‘បុរាណចីវរ’’ន្តិ ឥមិនាវ សិទ្ធត្តា. វុត្តញ្ហេតំ ‘‘បុរាណចីវរំ នាម សកិំ និវត្ថម្បិ សកិំ បារុតម្បី’’តិ (បារា. ៥០៥).

បុរាណចីវរសិក្ខាបទវណ្ណនា និដ្ឋិតា.