៩. រូបិយសំវោហារសិក្ខាបទវណ្ណនា

កតាទិវសេនាតិ កតអកតកតាកតវសេន. សុវណ្ណាទិចតុព្ពិធម្បិ និស្សគ្គិយវត្ថុ ឥធ រូបិយគ្គហណេន គហិតន្តិ អាហ ‘‘ជាតរូបរជតបរិវត្តន’’ន្តិ. ឥទញ្ច ឧក្កដ្ឋបរិច្ឆេទេន វុត្តន្តិ ទដ្ឋព្ពំ. តេនាហ ‘‘បុរិមសិក្ខាបទេន ហី’’តិអាទិ. បរិវត្តនន្តិ សាទិតរូបិយស្ស បរិវត្តនំ. បុរិមនយានុសារេនាតិ ‘‘អហំ, ភន្តេ, នានប្បការកំ រូបិយសំវោហារំ សមាបជ្ជិំ, ឥទំ មេ និស្សគ្គិយ’’ន្តិអាទិនា (បារា. ៥៨៩).

រូបិយសំវោហារវត្ថុស្មិន្តិ បដិគ្គហណស្សេវ បដិក្ខិត្តត្តា បដិគ្គហិតបរិវត្តនេ ទោសំ អទិស្វា រូបិយបរិវត្តនេ. តស្ស វាតិ បរិវត្តិតស្ស វា. ធនស្ស វាតិ អត្តនោ មូលធនស្ស វា. អត្តនោ វា ហិ អរូបិយេន បរស្ស រូបិយំ ចេតាបេយ្យ, អត្តនោ វា រូបិយេន បរស្ស អរូបិយំ, ឧភយថាបិ រូបិយសំវោហារោ កតោវ ហោតីតិ.

រូបិយសំវោហារសិក្ខាបទវណ្ណនា និដ្ឋិតា.