៥. ភោជនប្បដិគ្គហណបឋមសិក្ខាបទវណ្ណនា

ឯកតោអវស្សុតេតិ បុគ្គលស្ស វា ភិក្ខុនិយា វា អវស្សុតេ. មហាបច្ចរិយំ បនេត្ថ ‘‘ភិក្ខុនិយា អវស្សុតភាវេតិ ទដ្ឋព្ព’’ន្តិ (បាចិ. អដ្ឋ. ៧០១) វុត្តំ. តំ ‘‘អនវស្សុតោតិ ជានន្តី បដិគ្គណ្ហាតី’’តិ (បាចិ. ៧០៣) ឥមាយ បាឡិយា ន សមេតិ. យទិ ហិ បុគ្គលស្ស អវស្សុតភាវោ នប្បមាណំ, កិំ ‘‘អនវស្សុតោតិ ជានន្តី’’តិ ឥមិនា វចនេន, ‘‘អនាបត្តិ ឧភតោអនវស្សុតា ហោន្តិ, អនវស្សុតា បដិគ្គណ្ហាតី’’តិ ឯត្តកមេវ វត្តព្ពំ សិយា. ឧភោសុ អនវស្សុតេសូតិ បុគ្គលោ ចេវ ភិក្ខុនី ចាតិ ឧភោសុ អនវស្សុតេសុ គណ្ហន្តិយា សព្ពថាបិ អនាបត្តិ. ‘‘អនវស្សុតោ’’តិ វា ញត្វា គណ្ហន្តិយាតិ សយំ អនវស្សុតា សមានា អវស្សុតេបិ ‘‘អនវស្សុតោ អយ’’ន្តិ សញ្ញាយ តស្ស ហត្ថតោ បដិគ្គណ្ហន្តិយា. អថ សយំ អនវស្សុតាបិ អញ្ញំ អវស្សុតំ វា អនវស្សុតំ វា ‘‘អវស្សុតោ’’តិ ញត្វា បដិគ្គណ្ហាតិ, ទុក្កដមេវ. វុត្តញ្ហេតំ អនន្តរសិក្ខាបទេ ‘‘កិស្ស ត្វំ, អយ្យេ, ន បដិគ្គណ្ហាសីតិ, អវស្សុតា, អយ្យេតិ, ត្វំ បន, អយ្យេ, អវស្សុតាតិ, នាហំ, អយ្យេ, អវស្សុតា’’តិ.

ភោជនប្បដិគ្គហណបឋមសិក្ខាបទវណ្ណនា និដ្ឋិតា.