សាធារណបារាជិកំ

១. មេថុនធម្មសិក្ខាបទវណ្ណនា

អភិលាបមត្តន្តិ វចនមត្តំ, ន អត្ថោតិ អធិប្បាយោ. លិង្គភេទមត្តន្តិ បុរិសលិង្គំ ឥត្ថិលិង្គន្តិ វិសេសមត្តំ. វិសេសោតិ នានាត្តំ. ឆន្ទេន ចេវាតិ បេមេន ចេវ, សិនេហេន ចេវាតិ អត្ថោ. រុចិយា ចាតិ ឥច្ឆាយ ច. បធំសិតាយាតិ ទូសិតាយ. បរិបុណ្ណា ឧបសម្បទា យស្សា សា បរិបុណ្ណូបសម្បទា, ឧភតោសង្ឃេន ឧបសម្បន្នាតិ អត្ថោ.

មេថុនធម្មសិក្ខាបទវណ្ណនា និដ្ឋិតា.