៥. មញ្ចបីឋសិក្ខាបទវណ្ណនា

បញ្ចមេ មញ្ចន្តិ មសារកាទីសុ អញ្ញតរំ. បីឋម្បិ តាទិសមេវ, តំ បន មញ្ចោ វិយ អតិទីឃំ, អាសន្ទិកោ វិយ ច សមំ ចតុរស្សំ ន ហោតិ. ឆេទនកំ ភេទនកសទិសមេវ.

សាវត្ថិយំ ឧបនន្ទំ អារព្ភ ឧច្ចេ មញ្ចេ សយនវត្ថុស្មិំ បញ្ញត្តំ, បមាណិកំ ករោន្តស្ស, បមាណាតិក្កន្តំ លភិត្វា ឆិន្ទិត្វា យថា បមាណមេវ ឧបរិ ទិស្សតិ, ឯវំ និខណិត្វា វា, ឧត្តានំ វា កត្វា, អដ្ដកំ វា ពន្ធិត្វា បរិភុញ្ជន្តស្ស, ឧម្មត្តកាទីនញ្ច អនាបត្តិ. បមាណាតិក្កន្តមញ្ចបីឋតា, អត្តនោ អត្ថាយ ករណំ វា ការាបេត្វា វា បដិលាភោតិ ឥមានេត្ថ ទ្វេ អង្គានិ. សេសំ សព្ពំ សូចិឃរសិក្ខាបទសទិសមេវាតិ.

មញ្ចបីឋសិក្ខាបទវណ្ណនា និដ្ឋិតា.