១. សញ្ចិច្ចសិក្ខាបទវណ្ណនា

សប្បាណកវគ្គស្ស បឋមេ បាណោតិ តិរច្ឆានគតបាណោ អធិប្បេតោ. តំ ខុទ្ទកម្បិ មហន្តម្បិ មារេន្តស្ស បាចិត្តិយមេវ, មហន្តេ បន ឧបក្កមមហន្តតាយ អកុសលំ មហន្តំ ហោតិ.

សាវត្ថិយំ ឧទាយិត្ថេរំ អារព្ភ បាណំ ជីវិតា វោរោបនវត្ថុស្មិំ បញ្ញត្តំ, សាធារណបញ្ញត្តិ, សាណត្តិកំ, បាណេ វេមតិកស្ស, អបាណេ បាណសញ្ញិនោ, វេមតិកស្ស វា ទុក្កដំ. អបាណសញ្ញិស្ស, អសញ្ចិច្ច, អជានន្តស្ស, នមរណាធិប្បាយស្ស, ឧម្មត្តកាទីនញ្ច អនាបត្តិ. សេសំ មនុស្សវិគ្គហេ វុត្តនយមេវាតិ.

សញ្ចិច្ចសិក្ខាបទវណ្ណនា និដ្ឋិតា.