៥. ភិំសាបនសិក្ខាបទវណ្ណនា

បញ្ចមេ ភិំសាបេយ្យាតិ ភិំសាបនត្ថំ រូបាទីនិ ឧបសំហរេយ្យ, ភយានកកថំ វា កថេយ្យ. សោ បន ភាយតុ វា, មា វា, ឥតរស្ស បាចិត្តិយំ.

សាវត្ថិយំ ឆព្ពគ្គិយេ ភិក្ខូ អារព្ភ ភិំសាបនវត្ថុស្មិំ បញ្ញត្តំ, សាធារណបញ្ញត្តិ, អនាណត្តិកំ, តិកបាចិត្តិយំ. អនុបសម្បន្នេ តិកទុក្កដំ, ន ភិំសាបេតុកាមស្ស តថា ករោតោ, ឧម្មត្តកាទីនញ្ច អនាបត្តិ. ឧបសម្បន្នតា, តស្ស ទស្សនសវនវិសយេ ភិំសាបេតុកាមតាយ វាយាមនន្តិ ឥមានេត្ថ ទ្វេ អង្គានិ. សមុដ្ឋានាទីនិ អនន្តរសិក្ខាបទសទិសានេវាតិ.

ភិំសាបនសិក្ខាបទវណ្ណនា និដ្ឋិតា.