១. សុរាបានសិក្ខាបទវណ្ណនា

សុរាបានវគ្គស្ស បឋមេ សុរាមេរយបានេតិ ឯត្ថ បិដ្ឋាទីហិ កតំ មជ្ជំ សុរា, បុប្ផាទីហិ កតោ អាសវោ មេរយំ, តទុភយម្បិ ពីជតោ បដ្ឋាយ កុសគ្គេនាបិ បិវតោ បយោគេ បយោគេ បាចិត្តិយំ.

កោសម្ពិយំ សាគតត្ថេរំ អារព្ភ មជ្ជបិវនវត្ថុស្មិំ បញ្ញត្តំ, សាធារណបញ្ញត្តិ, អនាណត្តិកំ, តិកបាចិត្តិយំ, អមជ្ជេ មជ្ជសញ្ញិស្ស, វេមតិកស្ស វា ទុក្កដំ. អមជ្ជសញ្ញិស្ស, អមជ្ជំ មជ្ជវណ្ណគន្ធរសំ លោណសោវីរកំ វា សុត្តំ វា បិវតោ, វាសគ្គាហាបនត្ថំ ឦសកំ មជ្ជំ បក្ខិបិត្វា សូបាទីនិ បចន្តិ, តេសុ សូបសម្បាកាទីសុ, អាមលករសាទីហិ អមជ្ជំ មជ្ជសទិសំ អរិដ្ឋំ ករោន្តិ, តំ បិវតោ, ឧម្មត្តកាទីនញ្ច អនាបត្តិ. មជ្ជភាវោ, តស្ស បានញ្ចាតិ ឥមានេត្ថ ទ្វេ អង្គានិ. សមុដ្ឋានាទីនិ ឯឡកលោមសទិសានិ, ឥទំ បន លោកវជ្ជំ, អកុសលចិត្តំ, តិវេទនន្តិ.

សុរាបានសិក្ខាបទវណ្ណនា និដ្ឋិតា.