៧. មហានាមសិក្ខាបទវណ្ណនា

សត្តមេ ចតុមាសប្បច្ចយបវារណាតិ ចត្តារោ មាសេ គិលានប្បច្ចយបវារណា, សព្ពញ្ចេតំ វត្ថុវសេន វុត្តំ. អយំ បនេត្ថ អត្ថោ – ចតុមាសបវារណា វា ហោតុ, បុនបវារណា វា, និច្ចបវារណា វា, សព្ពាបិ សាទិតព្ពា, ‘‘ឥទានិ មម រោគោ នត្ថី’’តិ ន បដិក្ខិបិតព្ពា, ‘‘រោគេ បន សតិ វិញ្ញាបេស្សាមី’’តិ អធិវាសេតព្ពាតិ. តតោ ចេ ឧត្តរិ សាទិយេយ្យាតិ ឯត្ថ សចេ តត្ថ រត្តីហិ វា ភេសជ្ជេហិ វា បរិច្ឆេទោ កតោ ហោតិ ‘‘ឯត្តកាយេវ រត្តិយោ, ឯត្តកានិ វា ភេសជ្ជានិ វិញ្ញាបេតព្ពានី’’តិ, អថ តតោ រត្តិបរិយន្តតោ វា ភេសជ្ជបរិយន្តតោ វា ឧត្តរិ, ន ភេសជ្ជករណីយេន វា ភេសជ្ជំ, អញ្ញភេសជ្ជករណីយេន វា អញ្ញំ ភេសជ្ជំ វិញ្ញាបេន្តស្ស បាចិត្តិយំ.

សក្កេសុ ឆព្ពគ្គិយេ អារព្ភ ភេសជ្ជវិញ្ញាបនវត្ថុស្មិំ បញ្ញត្តំ, សាធារណបញ្ញត្តិ, អនាណត្តិកំ, តិកបាចិត្តិយំ, នតតុត្តរិ តតុត្តរិសញ្ញិនោ, វេមតិកស្ស វា ទុក្កដំ. នតតុត្តរិ នតតុត្តរិសញ្ញិស្ស, យេហិ ភេសជ្ជេហិ បវារិតោ, តតោ អញ្ញេហិ វា អធិកតរេហិ វា អត្ថេ សតិ, យាសុ ច រត្តីសុ បវារិតោ, តា អតិក្កមិត្វាបិ អត្ថេ សតិ យថាភូតំ អាចិក្ខិត្វា វិញ្ញាបេន្តស្ស, យេ ច ញាតកេ វា បុគ្គលិកប្បវារណាយ បវារិតេ វា អបរិយន្តបវារណាយ វា បវារិតេ, អញ្ញស្ស វា អត្ថាយ, អត្តនោ វា ធនេន វិញ្ញាបេន្តិ, តេសំ, ឧម្មត្តកាទីនញ្ច អនាបត្តិ. សង្ឃបវារណតា, តតោ ភេសជ្ជវិញ្ញត្តិ, អគិលានតា, បរិយន្តាតិក្កមោតិ ឥមានេត្ថ ចត្តារិ អង្គានិ. សមុដ្ឋានាទីនិ សញ្ចរិត្តសទិសានីតិ.

មហានាមសិក្ខាបទវណ្ណនា និដ្ឋិតា.