៧. វិហារការសិក្ខាបទវណ្ណនា

សត្តមេ មហល្លកន្តិ សសាមិកភាវេន សញ្ញាចិតកុដិតោ មហន្តភាវោ ឯតស្ស អត្ថីតិ មហល្លកោ, យស្មា វា វត្ថុំ ទេសាបេត្វា បមាណាតិក្កមេនាបិ កាតុំ វដ្ដតិ, តស្មា បមាណមហន្តតាយបិ មហល្លកោ, តំ មហល្លកំ. យស្មា បនស្ស តំ បមាណមហន្តត្តំ សសាមិកត្តាវ លព្ភតិ, តស្មា តទត្ថទស្សនត្ថំ ‘‘មហល្លកោ នាម វិហារោ សសាមិកោ វុច្ចតី’’តិ ឯវមស្ស បទភាជនេ (បារា. ៣៦៧) វុត្តំ. សេសំ សព្ពំ កុដិការសិក្ខាបទេ វុត្តសទិសំ, សសាមិកភាវមត្តមេវ ហិ វិសេសោ.

កោសម្ពិយំ ឆន្នត្ថេរំ អារព្ភ ចេតិយរុក្ខំ ឆេទាបនវត្ថុស្មិំ បញ្ញត្តភាវោ, អកិរិយមត្តតោ សមុដ្ឋានភាវោ, ឯកសង្ឃាទិសេសតា ច ឯត្ថ វិសេសោ.

វិហារការសិក្ខាបទវណ្ណនា និដ្ឋិតា.