១១. ភេទានុវត្តកសិក្ខាបទវណ្ណនា

ឯកាទសមេ តស្សេវ ខោ បនាតិ យោ សង្ឃភេទាយ បរក្កមតិ, តស្សេវ. អនុវត្តកាតិ តស្ស ទិដ្ឋិំ ខន្តិំ រុចិំ គហណេន អនុបដិបជ្ជនកា. វគ្គំ អសាមគ្គិបក្ខិយវចនំ វទន្តីតិ វគ្គវាទកា. យស្មា បន តិណ្ណំ ឧទ្ធំ កម្មារហា ន ហោន្តិ. ន ហិ សង្ឃោ សង្ឃស្ស កម្មំ ករោតិ, តស្មា ‘‘ឯកោ វា ទ្វេ វា តយោ វា’’តិ វុត្តំ. ជានាតិ នោតិ អម្ហាកំ ឆន្ទាទីនិ ជានាតិ. ភាសតីតិ ‘‘ឯវំ ករោមា’’តិ អម្ហេហិ សទ្ធិំ ភាសតិ. អម្ហាកម្បេតំ ខមតីតិ យំ សោ ករោតិ, ឯតំ អម្ហាកម្បិ រុច្ចតិ. សមេតាយស្មន្តានំ សង្ឃេនាតិ អាយស្មន្តានំ ចិត្តំ សង្ឃេន សទ្ធិំ សមេតុ សមាគច្ឆតុ, ឯកីភាវំ គច្ឆតូតិ វុត្តំ ហោតិ. សេសំ បទត្ថតោ ឧត្តានមេវ. វិនិច្ឆយកថាបេត្ថ ទសមេ វុត្តសទិសាយេវ.

អយំ បន វិសេសោ – ឥទំ រាជគហេ សម្ពហុលេ ភិក្ខូ អារព្ភ ទេវទត្តស្ស សង្ឃភេទាយ បរក្កមន្តស្ស អនុវត្តនវត្ថុស្មិំ បញ្ញត្តំ, អង្គេសុ ច យថា តត្ថ បរក្កមនំ, ឯវំ ឥធ អនុវត្តនំ ទដ្ឋព្ពន្តិ.

ភេទានុវត្តកសិក្ខាបទវណ្ណនា និដ្ឋិតា.