៧. ភិក្ខុនិឧម្មទ្ទាបនសិក្ខាបទវណ្ណនា

សត្តមេ ឧម្មទ្ទាបេយ្យាតិ ឧព្ពដ្ដាបេយ្យ. បរិមទ្ទាបេយ្យាតិ សម្ពាហាបេយ្យ. ឯត្ថ ច ហត្ថំ អមុញ្ចិត្វា ឧព្ពដ្ដនេ ឯកាវ អាបត្តិ, មោចេត្វា មោចេត្វា ឧព្ពដ្ដនេ បយោគគណនាយ អាបត្តិយោ. សម្ពាហនេបិ ឯសេវ នយោ.

សាវត្ថិយំ សម្ពហុលា ភិក្ខុនិយោ អារព្ភ ភិក្ខុនិយា ឧម្មទ្ទាបនបរិមទ្ទាបនវត្ថុស្មិំ បញ្ញត្តំ, គិលានាយ, អាបទាសុ, ឧម្មត្តិកាទីនញ្ច អនាបត្តិ. ឥធ មគ្គគមនបរិស្សមោបិ គេលញ្ញំ, ចោរភយាទីហិ សរីរកម្បនាទយោបិ អាបទា. សេសំ ចតុត្ថេ វុត្តនយេនេវ វេទិតព្ពន្តិ.

ភិក្ខុនិឧម្មទ្ទាបនសិក្ខាបទវណ្ណនា និដ្ឋិតា.