១០. អននុញ្ញាតសិក្ខាបទវណ្ណនា

ទសមេ មាតាបិតូហីតិ វិជាតមាតរា ច ជនកបិតរា ច. សាមិកេនាតិ យេន បរិគ្គហិតា, តេន. អននុញ្ញាតន្តិ ឧបសម្បទត្ថាយ អននុញ្ញាតំ. ទ្វិក្ខត្តុញ្ហិ ភិក្ខុនីហិ អាបុច្ឆិតព្ពំ, បព្ពជ្ជាកាលេ ច ឧបសម្បទាកាលេ ច, ភិក្ខូនំ បន សកិំ អាបុច្ឆិតេបិ វដ្ដតិ. តស្មា យា ឧបសម្បទាកាលេ អនាបុច្ឆា ឧបសម្បាទេតិ, តស្សា វុត្តនយេនេវ បាចិត្តិយំ.

សាវត្ថិយំ ថុល្លនន្ទំ អារព្ភ អននុញ្ញាតវុដ្ឋាបនវត្ថុស្មិំ បញ្ញត្តំ. អបលោកេត្វា វុដ្ឋាបេន្តិយា, តេសំ អត្ថិភាវំ អជានន្តិយា, ឧម្មត្តិកាទីនញ្ច អនាបត្តិ. អនបលោកនំ, អត្ថិភាវជាននំ, វុដ្ឋាបនន្តិ ឥមានេត្ថ តីណិ អង្គានិ. អននុញ្ញាតសមុដ្ឋានំ, កិរិយាកិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ.

អននុញ្ញាតសិក្ខាបទវណ្ណនា និដ្ឋិតា.