៣. សុត្តកន្តនសិក្ខាបទវណ្ណនា

តតិយេ សុត្តន្តិ ឆន្នំ អញ្ញតរំ. កន្តេយ្យាតិ ឯត្ថ យត្តកំ ហត្ថេន អញ្ឆិតំ ហោតិ, តស្មិំ តក្កម្ហិ វេឋិតេ ឯកា អាបត្តិ. ឥទញ្ហិ សន្ធាយ បទភាជនីយេ (បាចិ. ៩៨៨) ‘‘ឧជ្ជវុជ្ជវេ’’តិ វុត្តំ.

សាវត្ថិយំ ឆព្ពគ្គិយា ភិក្ខុនិយោ អារព្ភ សុត្តំ កន្តនវត្ថុស្មិំ បញ្ញត្តំ, កន្តនតោ បុព្ពេ កប្បាសវិចិននំ អាទិំ កត្វា សព្ពប្បយោគេសុ ហត្ថវារគណនាយ ទុក្កដំ. កន្តិតសុត្តំ កន្តន្តិយា, ឧម្មត្តិកាទីនញ្ច អនាបត្តិ. អកន្តិតតា, កន្តនន្តិ ឥមានេត្ថ ទ្វេ អង្គានិ. សមុដ្ឋានាទីនិ ឯឡកលោមសទិសានីតិ.

សុត្តកន្តនសិក្ខាបទវណ្ណនា និដ្ឋិតា.