៨. បរឧជ្ឈាបនកសិក្ខាបទវណ្ណនា

អដ្ឋមេ ទុគ្គហិតេន ទូបធារិតេនាតិ យំ វុត្តំ, តតោ អញ្ញថា គហិតេន ច ឧបធារិតេន ច. បរន្តិ ‘‘អហំ កិរយ្យេ អយ្យំ ន សក្កច្ចំ ឧបដ្ឋហាមី’’តិអាទិនា (បាចិ. ៨៦៩) នយេន ឧបសម្បន្នំ ឧជ្ឈាបេន្តិយា បាចិត្តិយំ.

សាវត្ថិយំ អញ្ញតរំ ភិក្ខុនិំ អារព្ភ ឯវំ បរំ ឧជ្ឈាបនវត្ថុស្មិំ បញ្ញត្តំ, តិកបាចិត្តិយំ, អនុបសម្បន្នាយ តិកទុក្កដំ, ឧម្មត្តិកាទីនំយេវ អនាបត្តិ. ទុគ្គហិតតា, ឧជ្ឈាបនំ, យំ ឧជ្ឈាបេតិ, តស្សា ឧបសម្បន្នតាតិ ឥមានេត្ថ តីណិ អង្គានិ. សមុដ្ឋានាទីនិ អទិន្នាទានសទិសានិ, ឥទំ បន ទុក្ខវេទនន្តិ.

បរឧជ្ឈាបនកសិក្ខាបទវណ្ណនា និដ្ឋិតា.