៨. បឋមឧច្ចារឆឌ្ឌនសិក្ខាបទវណ្ណនា

អដ្ឋមេ សង្ការន្តិ កចវរំ. វិឃាសន្តិ យំកិញ្ចិ បរិភុត្តាវសេសំ ឧច្ឆិដ្ឋោទកម្បិ ទន្តកដ្ឋម្បិ, អដ្ឋិកចលកេសុ បន វត្តព្ពមេវ នត្ថិ. តិរោកុដ្ដេ វា តិរោបាការេ វាតិ យស្សកស្សចិ កុដ្ដស្ស វា បាការស្ស វា បរតោ. ឆឌ្ឌេយ្យ វា ឆឌ្ឌាបេយ្យ វាតិ សព្ពានិបេតានិ ឯកតោ ឆឌ្ឌេន្តិយា ឯកប្បយោគេ ឯកាបត្តិ, សកិំ អាណត្តិយា ពហុកេបិ ឆឌ្ឌិតេ ឯកាវ.

សាវត្ថិយំ អញ្ញតរំ ភិក្ខុនិំ អារព្ភ ឧច្ចារំ តិរោកុដ្ដេ ឆឌ្ឌនវត្ថុស្មិំ បញ្ញត្តំ, សាណត្តិកំ, ភិក្ខុស្ស ទុក្កដំ, ឱលោកេត្វា វា អវលញ្ជេ វា ឆឌ្ឌេន្តិយា, ឧម្មត្តិកាទីនញ្ច អនាបត្តិ. ឧច្ចារាទិភាវោ, អនោលោកនំ, វលញ្ជនដ្ឋានំ, តិរោកុដ្ដតិរោបាការតា, ឆឌ្ឌនំ វា ឆឌ្ឌាបនំ វាតិ ឥមានេត្ថ បញ្ច អង្គានិ. សមុដ្ឋានាទីនិ សញ្ចរិត្តសទិសានិ, ឥទំ បន កិរិយាកិរិយន្តិ.

បឋមឧច្ចារឆឌ្ឌនសិក្ខាបទវណ្ណនា និដ្ឋិតា.