បញ្ហសមោធានវណ្ណនា

សមោធានេតព្ពាតិ សមាហរិតព្ពា.

៣៤៩. ឱកប្បនាតិ ពលវសទ្ធា. អាយតិំ ភិក្ខូនំ អវិវាទហេតុភូតំ តត្ថ តត្ថ ភគវតា ទេសិតានំ អត្ថានំ សង្គាយនំ សង្គីតិ, តស្ស ច ការណំ អយំ សុត្តទេសនា តថា បវត្តត្តាតិ វុត្តំ ‘‘សង្គីតិបរិយាយន្តិ សាមគ្គិយា ការណ’’ន្តិ. សមនុញ្ញោ សត្ថា អហោសិ ‘‘បដិភាតុ ត,ំ សារិបុត្ត, ភិក្ខូនំ ធម្មិំ កថា’’តិ ឧស្សាហេត្វា អាទិតោ បដ្ឋាយ យាវ បរិយោសានា សុណន្តោ, សា បនេត្ថ ភគវតោ សមនុញ្ញតា ‘‘សាធុ, សាធូ’’តិ អនុមោទនេន បាកដា ជាតាតិ វុត្តំ ‘‘អនុមោទនេន សមនុញ្ញោ អហោសី’’តិ. ជិនភាសិតោ នាម ជាតោ, ន សាវកភាសិតោ. យថា ហិ រាជយុត្តេហិ លិខិតបណ្ណំ យាវ រាជមុទ្ទិកាយ ន លញ្ជិតំ ហោតិ, ន តាវ ‘‘រាជបណ្ណ’’ន្តិ សង្ខ្យំ គច្ឆតិ, លញ្ជិតមត្តំ បន រាជបណ្ណំ នាម ហោតិ. ឯវមេវ ‘‘សាធុ, សាធុ សារិបុត្តា’’តិអាទិ អនុមោទនវចនសំសូចិតាយ សមនុញ្ញាសង្ខាតាយ ជិនវចនមុទ្ទាយ លញ្ជិតត្តា អយំ សុត្តន្តោ ជិនភាសិតោ នាម ជាតោ អាហច្ចវចនោ. យំ បនេត្ថ អត្ថតោ ន វិភត្តំ, តំ សុវិញ្ញេយ្យមេវាតិ.

សង្គីតិសុត្តវណ្ណនាយ លីនត្ថប្បកាសនា.