១១. គតិអនុយោគវណ្ណនា

៦៩-៧២. ‘‘ទស្សេន្តោ ‘តេន ហិ បុគ្គលោ សន្ធាវតី’តិអាទិមាហា’’តិ វុត្តំ, ‘‘ទស្សេន្តោ ‘ន វត្តព្ពំ បុគ្គលោ សន្ធាវតី’តិអាទិមាហា’’តិ បន ភវិតព្ពំ, ទស្សេត្វាតិ វា វត្តព្ពំ.

៩១. យេន រូបសង្ខាតេន សរីរេន សទ្ធិំ គច្ឆតីតិ ឯត្ថ ‘‘រូបេន សទ្ធិំ គច្ឆតី’’តិ វទន្តេន ‘‘រូបំ បុគ្គលោ’’តិ អននុញ្ញាតត្តា យេនាការេន តំ ជីវំ តំ សរីរន្តិ ឥទំ អាបជ្ជតិ, សោ វត្តព្ពោ. អសញ្ញូបបត្តិំ សន្ធាយាតិ និរយូបគស្ស បុគ្គលស្ស អសញ្ញូបគស្ស អរូបូបគស្ស ច អន្តរាភវំ ន ឥច្ឆតីតិ ចុតិតោ អនន្តរំ ឧបបត្តិំ សន្ធាយាតិ អត្ថោ ទដ្ឋព្ពោ. យេ បន ចុតិកាលេ ឧបបត្តិកាលេ ច អសញ្ញូបបត្តិកាលេ ច អសញ្ញសត្តេសុ សញ្ញា អត្ថីតិ គហេត្វា អសញ្ញូបគស្ស ច អន្តរាភវំ ឥច្ឆេយ្យុំ, តេសំ អន្តរាភវភាវតោ ‘‘អសញ្ញូបបត្តិ អវេទនា’’តិ ន សក្កា វត្តុន្តិ.

៩២. អវេទនោតិអាទីសុ តទញ្ញន្តិ សញ្ញភវតោ អញ្ញំ អសញ្ញានេវសញ្ញានាសញ្ញាយតនុបបត្តិំ. នេវសញ្ញានាសញ្ញាយតនេបិ ហិ ន វត្តព្ពំ សញ្ញា អត្ថីតិ ឥច្ឆន្តិ.

៩៣. យស្មា រូបាទិធម្មេ វិនា បុគ្គលោ នត្ថីតិ ឥន្ធនុបាទានោ អគ្គិ វិយ ឥន្ធនេន រូបាទិឧបាទានោ បុគ្គលោ រូបាទិនា វិនា នត្ថីតិ លទ្ធិវសេន វទតិ.

គតិអនុយោគវណ្ណនា និដ្ឋិតា.