៩. អបរិយាបន្នកថាវណ្ណនា

៧០៩-៧១០. តស្មាតិ យស្មា ទិដ្ឋិរាគានំ សមានេ វិក្ខម្ភនភាវេបិ ‘‘វីតរាគោ’’តិ វុច្ចតិ, ន បន ‘‘វិគតទិដ្ឋិកោ’’តិ, តស្មា ទិដ្ឋិ លោកិយបរិយាបន្នា ន ហោតីតិ អត្ថំ វទន្តិ. រូបទិដ្ឋិយា អភាវា បន កាមធាតុបរិយាបន្នាយ ទិដ្ឋិយា ភវិតព្ពំ. យទិ ច បរិយាបន្នា សិយា, តថា ច សតិ កាមរាគោ វិយ ឈានលាភិនោ ទិដ្ឋិបិ វិគច្ឆេយ្យាតិ ‘‘វិគតទិដ្ឋិកោ’’តិ វត្តព្ពោ សិយា, ន ច វុច្ចតិ, តស្មា អបរិយាបន្នា ទិដ្ឋិ. ន ហិ សា តស្ស អវិគតា ទិដ្ឋិ កាមរាគោ វិយ កាមទិដ្ឋិ យេន កាមធាតុយា បរិយាបន្នា សិយាតិ វទតីតិ វេទិតព្ពំ.

អបរិយាបន្នកថាវណ្ណនា និដ្ឋិតា.

ចុទ្ទសមវគ្គវណ្ណនា និដ្ឋិតា.