៥. សត្តក្ខត្តុបរមកថាវណ្ណនា

៦៤១-៦៤៥. សត្តក្ខត្តុបរមតានិយតោតិ សត្តក្ខត្តុបរមតាយ និយតោ. ឥមំ វិភាគន្តិ ឥមំ វិសេសំ. ត្វំ បនស្ស និយាមំ ឥច្ឆសីតិ អវិនិបាតធម្មតាផលប្បត្តីហិ អញ្ញស្មិំ សត្តក្ខត្តុបរមភាវេ ច និយាមំ ឥច្ឆសីតិ អត្ថោ.

អានន្តរិយាភាវន្តិ យេន សោ ធម្មាភិសមយេន ភព្ពោ នាម ហោតិ, តស្ស អានន្តរិយកម្មស្ស អភាវន្តិ អត្ថោ, បុគ្គលស្ស វា អានន្តរិយភាវស្ស អភាវន្តិ. កិំ បន សោ អន្តរាធម្មំ អភិសមិស្សតីតិ? កេចិ វទន្តិ ‘‘សត្តក្ខត្តុបរមោ សត្តមំ ភវំ នាតិក្កមតិ, ឱរតោ បន នត្ថិ បដិសេធោ’’តិ. អបរេ ‘‘យោ ភគវតា ញាណពលេន ព្យាកតោ, តស្ស អន្តរា អភិសមយោ នាម នត្ថិ, តថាបិ ភវនិយាមស្ស កស្សចិ អភាវា ភព្ពោតិ វុច្ចតិ. យថា កុសលា អភិញ្ញាចេតនា កទាចិ វិបាកំ អទទមានាបិ សតិ ការណេ ទាតុំ ភព្ពតាយ វិបាកធម្មធម្មា នាម, តថា ឥន្ទ្រិយានំ មុទុតាយ សត្តក្ខត្តុបរមោ, ន និយាមសព្ភាវា នាបិ ភគវតា ព្យាកតត្តា, ន ច ឥន្ទ្រិយមុទុតា អភព្ពតាករោ ធម្មោតិ ន សោ អភព្ពោ នាម. អភព្ពតាករធម្មាភាវតោ ចេត្ថ អភព្ពតា បដិសេធិតា, ន បន អន្តរា អភិសមេតុំ ភព្ពតា វុត្តា. យទិ ច សត្តក្ខត្តុបរមោ អន្តរា អភិសមេយ្យ, កោលំកោលោ សិយា’’តិ. វិសេសំ បន អកត្វា ភព្ពសភាវតាយ ភព្ពោតិ វត្តុំ យុត្តំ. ន ភវនិយាមកំ កិញ្ចីតិ ឯត្ថ បស្សិត្វាតិ វចនសេសោ, ព្យាករោតីតិ វា សម្ពន្ធោ.

សត្តក្ខត្តុបរមកថាវណ្ណនា និដ្ឋិតា.

ទ្វាទសមវគ្គវណ្ណនា និដ្ឋិតា.