៥. ទារុកម្មិកសុត្តវណ្ណនា

៥៩. បញ្ចមេ បុត្តសម្ពាធសយនន្តិ បុត្តេហិ សម្ពាធសយនំ. ឯត្ថ បុត្តសីសេន ទារបរិគ្គហំ បុត្តទារេសុ ឧប្បិលោ វិយ. តេន តេសំ រោគាទិហេតុ សោកាភិភវេន ច ចិត្តស្ស សំកិលិដ្ឋតំ ទស្សេតិ. កាមភោគិនាតិ ឥមិនា បន រាគាភិភវន្តិ. ឧភយេនបិ វិក្ខិត្តចិត្តតំ ទស្សេតិ. កាសិកចន្ទនន្តិ ឧជ្ជលចន្ទនំ. តំ កិរ វណ្ណវិសេសសមុជ្ជលំ ហោតិ បភស្សរំ, តទត្ថមេវ នំ សណ្ហតរំ ករោន្តិ. តេនេវាហ ‘‘សណ្ហចន្ទន’’ន្តិ, កាសិកវត្ថញ្ច ចន្ទនញ្ចាតិ អត្ថោ. មាលាគន្ធវិលេបនន្តិ វណ្ណសោភត្ថញ្ចេវ សុគន្ធភាវត្ថញ្ច មាលំ, សុគន្ធភាវត្ថាយ គន្ធំ, ឆវិរាគករណត្ថញ្ចេវ សុភត្ថញ្ច វិលេបនំ ធារេន្តេន. ជាតរូបរជតន្តិ សុវណ្ណញ្ចេវ អវសិដ្ឋធនញ្ច សាទិយន្តេន. សព្ពេនបិ កាមេសុ អភិគិទ្ធភាវមេវ បកាសេតិ.

ទារុកម្មិកសុត្តវណ្ណនា និដ្ឋិតា.