៥. វិជ្ជាភាគិយសុត្តវណ្ណនា

៣៥. បញ្ចមេ សម្បយោគវសេន វិជ្ជំ ភជន្តិ, សហជាតអញ្ញមញ្ញនិស្សយសម្បយុត្តអត្ថិអវិគតាទិបច្ចយវសេន តាយ សហ ឯកីភាវំ គច្ឆន្តីតិ វិជ្ជាភាគិយា. អថ វា វិជ្ជាភាគេ វិជ្ជាកោដ្ឋាសេ វត្តន្តិ វិជ្ជាសភាគតាយ តទេកទេសេ វិជ្ជាកោដ្ឋាសេ បវត្តន្តីតិ វិជ្ជាភាគិយា. តត្ថ វិបស្សនាញាណំ, មនោមយិទ្ធិ, ឆ អភិញ្ញាតិ អដ្ឋ វិជ្ជា. បុរិមេន អត្ថេន តាហិ សម្បយុត្តធម្មា វិជ្ជាភាគិយា. បច្ឆិមេន អត្ថេន តាសុ យា កាចិ ឯកាវ វិជ្ជា វិជ្ជា, សេសា វិជ្ជាភាគិយា. ឯវំ វិជ្ជាបិ វិជ្ជាយ សម្បយុត្តធម្មាបិ ‘‘វិជ្ជាភាគិយា’’ត្វេវ វេទិតព្ពា. ឥធ បន វិបស្សនាញាណសម្បយុត្តា សញ្ញាវ វិជ្ជាភាគិយាតិ អាគតា, សញ្ញាសីសេន សេសសម្បយុត្តធម្មាបិ វុត្តា ឯវាតិ ទដ្ឋព្ពំ. អនិច្ចានុបស្សនាញាណេតិ អនិច្ចានុបស្សនាញាណេ និស្សយបច្ចយភូតេ ឧប្បន្នសញ្ញា, តេន សហគតាតិ អត្ថោ. សេសេសុបិ ឯសេវ នយោ.

វិជ្ជាភាគិយសុត្តវណ្ណនា និដ្ឋិតា.