៦-៧. កាលទានសុត្តាទិវណ្ណនា

៣៦-៣៧. ឆដ្ឋេ អារាមតោតិ ផលារាមតោ. បឋមុប្បន្នានីតិ សព្ពបឋមំ សុជាតានិ. ភាសិតញ្ញូតិ ភិក្ខូ ឃរទ្វារេ ឋិតា កិញ្ចាបិ តុណ្ហី ហោន្តិ, អត្ថតោ បន ‘‘ភិក្ខំ ទេថា’’តិ វទន្តិ នាម អរិយាយ យាចនាយ. វុត្តញ្ហេតំ ‘‘ឧទ្ធិស្ស អរិយា តិដ្ឋន្តិ, ឯសា អរិយានំ យាចនា’’តិ. តត្រ យេ ‘‘មយំ បចាម, ឥមេ ន បចន្តិ, បចមានេ បត្វា អលភន្តា កុហិំ លភិស្សន្តី’’តិ ទេយ្យធម្មំ សំវិភជន្តិ, តេ ភាសិតញ្ញូ នាម ញត្វា កត្តព្ពស្ស ករណតោ. យុត្តប្បត្តកាលេតិ ទាតុំ យុត្តប្បត្តកាលេ. អប្បដិវានចិត្តោតិ អនិវត្តនចិត្តោ. សត្តមំ ឧត្តានមេវ.

កាលទានសុត្តាទិវណ្ណនា និដ្ឋិតា.