១-២. អក្កោសកសុត្តាទិវណ្ណនា

២១១-២. ទុតិយស្ស បឋមេ ទសហិ អក្កោសវត្ថូហិ អក្កោសកោតិ ‘‘ពាលោសិ, មូឡ្ហោសិ, ឱដ្ឋោសិ, គោណោសិ, គទ្រភោសី’’តិអាទិនា ទសហិ អក្កោសវត្ថូហិ អក្កោសកោ. ‘‘ហោតុ, មុណ្ឌកសមណ, អទណ្ឌោ អហន្តិ ករោសិ, ឥទានិ តេ រាជកុលំ គន្ត្វា ទណ្ឌំ អារោបេស្សាមី’’តិអាទីនិ វទន្តោ បរិភាសកោ នាមាតិ អាហ ‘‘ភយទស្សនេន បរិភាសកោ’’តិ. លោកុត្តរធម្មា អបាយមគ្គស្ស បរិបន្ថភាវតោ បរិបន្ថោ នាមាតិ អាហ ‘‘លោកុត្តរបរិបន្ថស្ស ឆិន្នត្តា’’តិ, លោកុត្តរសង្ខាតស្ស អបាយមគ្គបរិបន្ថស្ស ឆិន្នត្តាតិ អត្ថោ. ទុតិយេ នត្ថិ វត្តព្ពំ.

អក្កោសកសុត្តាទិវណ្ណនា និដ្ឋិតា.