៣-១០. សីលសុត្តាទិវណ្ណនា

២១៣-២២០. តតិយេ (ទី. និ. ដី. ២.១៤៩) ទុស្សីលោតិ ឯត្ថ ទុ-សទ្ទោ អភាវត្ថោ ‘‘ទុប្បញ្ញោ’’តិអាទីសុ (ម. និ. ១.៤៤៩) វិយ, ន គរហណត្ថោតិ អាហ ‘‘អសីលោ និស្សីលោ’’តិ. ភិន្នសំវរោតិ ឯត្ថ សមាទិន្នសីលោ កេនចិ ការណេន សីលភេទំ បត្តោ, សោ តាវ ភិន្នសំវរោ ហោតុ. យោ បន សព្ពេន សព្ពំ អសមាទិន្នសីលោ អាចារហីនោ, សោ កថំ ភិន្នសំវរោ នាម ហោតីតិ? សោបិ សាធុសមាចារស្ស បរិហរណីយស្ស ភេទិតត្តា ភិន្នសំវរោ ឯវ នាម. វិនដ្ឋសំវរោ សំវររហិតោតិ ហិ វុត្តំ ហោតិ. តំ តំ សិប្បដ្ឋានំ. មាឃាតកាលេតិ ‘‘មា ឃាតេថ បាណីន’’ន្តិ ឯវំ មាឃាតឃោសនំ ឃោសិតទិវសេ. អព្ភុគ្គច្ឆតិ បាបកោ កិត្តិសទ្ទោ. អជ្ឈាសយេន មង្កុ ហោតិយេវ វិប្បដិសារិភាវតោ.

តស្សាតិ ទុស្សីលស្ស. សមាទាយ វត្តិតដ្ឋានន្តិ ឧដ្ឋាយ សមុដ្ឋាយ កតការណំ. អាបាថំ អាគច្ឆតីតិ តំ មនសោ ឧបដ្ឋាតិ. ឧម្មីលេត្វា ឥធលោកន្តិ ឧម្មីលនកាលេ អត្តនោ បុត្តទារាទិវសេន ឥធលោកំ បស្សតិ. និមីលេត្វា បរលោកន្តិ និមីលនកាលេ គតិនិមិត្តុបដ្ឋានវសេន បរលោកំ បស្សតិ. តេនាហ ‘‘ចត្តារោ អបាយា’’តិអាទិ. បញ្ចមបទន្តិ ‘‘កាយស្ស ភេទា’’តិអាទិនា វុត្តោ បញ្ចមោ អាទីនវកោដ្ឋាសោ. វុត្តវិបរិយាយេនាតិ វុត្តត្ថាយ អាទីនវកថាយ វិបរិយាយេន ‘‘អប្បមត្តោ តំ តំ កសិវណិជ្ជាទិំ យថាកាលំ សម្បាទេតុំ សក្កោតី’’តិអាទិនា. បាសំសំ សីលមស្ស អត្ថីតិ សីលវា. សីលសម្បន្នោតិ សីលេន សមន្នាគតោ សម្បន្នសីលោតិ ឯវមាទិកំ បន អត្ថវចនំ សុករន្តិ អនាមដ្ឋំ. ចតុត្ថាទីនិ ឧត្តានត្ថានេវ.

សីលសុត្តាទិវណ្ណនា និដ្ឋិតា.

អក្កោសកវគ្គវណ្ណនា និដ្ឋិតា.