៧. កាមសុត្តវណ្ណនា

៧. សត្តមេ អសន្តិ លូនន្តិ តេនាតិ អសិតំ, ទាត្តំ. វិវិធា អាភញ្ជន្តិ ភារំ ឱលម្ពេន្តិ តេនាតិ ព្យាភង្គី, វិធំ. កុលបុត្តោតិ ឯត្ថ ទុវិធោ កុលបុត្តោ ជាតិកុលបុត្តោ, អាចារកុលបុត្តោ ច. តត្ថ ‘‘តេន ខោ បន សមយេន រដ្ឋបាលោ នាម កុលបុត្តោ តស្មិំយេវ ថុល្លកោដ្ឋិកេ អគ្គកុលិកស្ស បុត្តោ’’តិ (ម. និ. ២.២៩៤) ឯវំ អាគតោ ឧច្ចកុលប្បសុតោ ជាតិកុលបុត្តោ នាម. ‘‘យេ តេ កុលបុត្តា សទ្ធា អគារស្មា អនគារិយំ បព្ពជិតា’’តិ (ម. និ. ១.៣៤) ឯវំ អាគតា បន យត្ថ កត្ថចិ កុលេ បសុតាបិ អាចារសម្បន្នា អាចារកុលបុត្តោ នាម. ឥធ បន អាចារកុលបុត្តោ អធិប្បេតោ. តេនាហ ‘‘កុលបុត្តោតិ អាចារកុលបុត្តោ’’តិ. យុត្តន្តិ អនុច្ឆវិកំ, ឯវំ វត្តព្ពតំ អរហតីតិ អត្ថោ. សេសមេត្ថ ឧត្តានមេវ.

កាមសុត្តវណ្ណនា និដ្ឋិតា.