៩. វិបល្លាសសុត្តវណ្ណនា

៤៩. នវមេ អនិច្ចាទីនិ វត្ថូនិ និច្ចន្តិអាទិនា វិបរីតតោ អសន្តីតិ វិបល្លាសា, សញ្ញាយ វិបល្លាសោ សញ្ញាវិបល្លាសោ. ឥតរេសុបិ តីសុ ឯសេវ នយោ. ឯវមេតេ ចតុន្នំ វត្ថូនំ វសេន ចត្តារោ, តេសុ វត្ថូសុ សញ្ញាទីនំ វសេន ទ្វាទស ហោន្តិ. តេសុ អដ្ឋ សោតាបត្តិមគ្គេន បហីយន្តិ. អសុភេ សុភន្តិ សញ្ញាចិត្តវិបល្លាសា សកទាគាមិមគ្គេន តនុកា ហោន្តិ, អនាគាមិមគ្គេន បហីយន្តិ. ទុក្ខេ សុខន្តិ សញ្ញាចិត្តវិបល្លាសា អរហត្តមគ្គេន បហីយន្តីតិ វេទិតព្ពា. សេសមេត្ថ ឧត្តានមេវ.

វិបល្លាសសុត្តវណ្ណនា និដ្ឋិតា.