៧. អបរិហានិយសុត្តវណ្ណនា

៣៧. សត្តមេ និព្ពានសន្តិកេយេវ ចរតីតិ កិលេសនិព្ពានស្ស អនុបាទាបរិនិព្ពានស្ស ច សន្តិកេយេវ ចរតិ ‘‘ន ចិរស្សេវ អធិគមិស្សតី’’តិ កត្វា. គាថាយ អប្បមាទរតោតិ សមថវិបស្សនាយ អប្បមជ្ជនេ រតោ អភិរតោ, អប្បមាទេនេវ រត្តិន្ទិវំ វីតិនាមេន្តោតិ អត្ថោ. បមាទំ ភយតោ បស្សន្តោតិ និរយូបបត្តិអាទិភយហេតុតោ បមាទំ ភយតោ បស្សន្តោ. អភព្ពោ បរិហានាយាតិ សោ ឯវរូបោ សមថវិបស្សនាធម្មេហិ មគ្គផលេហិ វា បរិហានាយ អភព្ពោ. សមថវិបស្សនាតោ ហិ សម្បត្តតោ ន បរិហាយតិ, ឥតរានិ ច អប្បត្តានិ បាបុណាតីតិ.

អបរិហានិយសុត្តវណ្ណនា និដ្ឋិតា.