(២៣) ៣. ទុច្ចរិតវគ្គវណ្ណនា

២២១-២៣១. តតិយស្ស បឋមាទីនិ ឧត្តានត្ថានេវ. ចិន្តាកវីតិអាទីសុ វត្ថុអនុសន្ធិឧភយមេវ ចិរេន ចិន្តេត្វា ករណវសេន ចិន្តាកវិ វេទិតព្ពោ. កិញ្ចិ សុត្វា សុតេន អស្សុតំ អនុសន្ធេត្វា ករណវសេន សុតកវិ, កិញ្ចិ អត្ថំ ឧបធារេត្វា តស្ស សង្ខិបនវិត្ថារណាទិវសេន អត្ថកវិ យំកិញ្ចិ បរេន កតំ កព្ពំ នាដកំ វា ទិស្វា តំសទិសមេវ អញ្ញំ អត្តនោ ឋានុប្បត្តិកប្បដិភានេន ករណវសេន បដិភានកវិ វេទិតព្ពោ.

ទុច្ចរិតវគ្គវណ្ណនា និដ្ឋិតា.