៩. សសង្ខារសុត្តវណ្ណនា

១៦៩. នវមេ សសង្ខារេន ទុក្ខេន កសិរេន អធិមត្តបយោគំ កត្វាវ កិលេសបរិនិព្ពានធម្មោតិ សសង្ខារបរិនិព្ពាយី. អសង្ខារេន អប្បយោគេន អធិមត្តបយោគំ អកត្វាវ កិលេសបរិនិព្ពានធម្មោតិ អសង្ខារបរិនិព្ពាយី. ធម្មានុសារី បុគ្គលោ ហិ អាគមនម្ហិ កិលេសេ វិក្ខម្ភេន្តោ អប្បទុក្ខេន អកសិរេន អកិលមន្តោវ វិក្ខម្ភេតុំ សក្កោតិ. សទ្ធានុសារី បុគ្គលោ បន ទុក្ខេន កសិរេន កិលមន្តោ ហុត្វា វិក្ខម្ភេតុំ, តស្មា ធម្មានុសារិស្ស បុព្ពភាគមគ្គក្ខណេ កិលេសច្ឆេទកំ ញាណំ អទន្ធំ តិខិណំ សូរំ ហុត្វា វហតិ. យថា នាម តិខិណេន អសិនា កទលិំ ឆិន្ទន្តស្ស ឆិន្នដ្ឋានំ មដ្ឋំ ហោតិ, អតិសីឃំ វហតិ, សទ្ទោ ន សុយ្យតិ, ពលវវាយាមកិច្ចំ ន ហោតិ, ឯវរូបា ធម្មានុសារិនោ បុព្ពភាគភាវនា ហោតិ. សទ្ធានុសារិនោ បន បុព្ពភាគក្ខណេ កិលេសច្ឆេទកំ ញាណំ ទន្ធំ អតិខិណំ អសូរំ ហុត្វា វហតិ. យថា នាម កុណ្ឋេន អសិនា កទលិំ ឆិន្ទន្តស្ស ឆិន្នដ្ឋានំ ន មដ្ឋំ ហោតិ, អតិសីឃំ ន វហតិ, សទ្ទោ សុយ្យតិ, ពលវវាយាមកិច្ចំ ឥច្ឆិតព្ពំ ហោតិ, ឯវរូបា សទ្ធានុសារិនោ បុព្ពភាគភាវនា ហោតិ. ឯវំ សន្តេបិ នេសំ កិលេសក្ខយេ នានត្តំ នត្ថិ, អនវសេសាវ កិលេសា ខីយន្តិ.

សសង្ខារសុត្តវណ្ណនា និដ្ឋិតា.