២. បដិភានសុត្តវណ្ណនា

១៣២. ទុតិយេ បដិភានំ វុច្ចតិ ញាណម្បិ ញាណស្ស ឧបដ្ឋិតវចនម្បិ, តំ ឥធ អធិប្បេតំ, អត្ថយុត្តំ ការណយុត្តញ្ច បដិភានមស្សាតិ យុត្តប្បដិភានោ. បុច្ឆានន្តរមេវ សីឃំ ព្យាកាតុំ អសមត្ថតាយ នោមុត្តប្បដិភានមស្សាតិ នោមុត្តប្បដិភានោ. ឥមិនា នយេន សេសា វេទិតព្ពា. ឯត្ថ បន បឋមោ កញ្ចិ កាលំ វីមំសិត្វា យុត្តមេវ បេក្ខតិ តិបិដកចូឡនាគត្ថេរោ វិយ. សោ បន បញ្ហំ បុដ្ឋោ បរិគ្គហេត្វា យុត្តប្បត្តការណមេវ កថេតិ. ទុតិយោ បុច្ឆានន្តរមេវ យេន វា តេន វា វចនេន បដិពាហតិ, វីមំសិត្វាបិ ច យុត្តំ ន បក្ខេតិ ចតុនិកាយិកបិណ្ឌតិស្សត្ថេរោ វិយ. សោ បន បញ្ហំ បុដ្ឋោ បញ្ហបរិយោសានម្បិ នាគមេតិ, យំ វា តំ វា កថេតិយេវ, វចនត្ថំ បនស្ស វីមំសិយមានំ កត្ថចិ ន លគតិ. តតិយោ បុច្ឆាសមកាលមេវ យុត្តំ បេក្ខតិ, តំខណំយេវ ច នំ ព្យាករោតិ តិបិដកចូឡាភយត្ថេរោ វិយ. សោ បន បញ្ហំ បុដ្ឋោ សីឃមេវ កថេតិ, យុត្តប្បត្តការណោ ច ហោតិ. ចតុត្ថោ បុដ្ឋោ សមានោ នេវ យុត្តំ បេក្ខតិ, ន យេន វា តេន វា បដិពាហិតុំ សក្កោតិ, តិព្ពន្ធការនិមុគ្គោ វិយ ហោតិ លាឡុទាយិត្ថេរោ វិយ.

បដិភានសុត្តវណ្ណនា និដ្ឋិតា.